Fondo di Sociedad pa Salon di Reino—Bo Ta Participá den Dje?
1 Sociedad ta conciente cu e situacion económico djawe ta pone cu pa algun congregacion ta difícil pa nan haña lugá adecuá pa tene nan reunionnan, i cu tin un necesidad urgente pa yuda e congregacionnan aki. Esaki ta un motibu pakico a establecé e Fondo di Sociedad pa Salon di Reino pa yuda congregacionnan financiá construccion di Salon di Reino cu nan tin mester.
2 Na e Congresonan di Distrito 1983 “Unidad di Reino,” e Cuerpo Gobernante a describí e areglo di Fondo di Sociedad pa Salon di Reino i a haci aplicacion di 2 Corintionan 8:14 i 15, cu ta animá pa laga e exceso di esnan cu tin compensá loke otronan falta di manera cu “un igualacion por tuma lugá.” A invitá cada congregacion pa pone un caha marcá “Contribucion pa Fondo di Sociedad pa Salon di Reino.” Tur loke ser depositá den e caha ei lo ser usá solamente pa e propósito ei.
3 E Fondo di Sociedad pa Salon di Reino no ta trata cu ningun financiamentu comercial di pafó. Mas bien, Jehova su organisacion a pone dilanti cada un di nos e oportunidad pa duna contribucion na e fondo aki riba un base regular. Sí, nos generosidad cristian motivá dor dje spiritu di Dios por satisfacé gran parti dje necesidad pa mas Salonnan di Reino.—Compará cu 2 Corintionan 9:8-15.
4 Con E Ta Funcioná? E Fondo di Sociedad pa Salon di Reino ta duna fiansa pa yuda construí Salonnan di Reino nobo. Segun cu ta paga e fiansa bek, ta fia e fondonan aki na otro congregacionnan cu tin mester. Ta bentahoso pa tuma contacto cu Sociedad promé cu haci un peticion di fiansa cerca un compania comercial.
5 Tur congregacion mester tin un caha di contribucion designá como Fondo di Sociedad pa Salon di Reino. Haci sigur cu e ta ubicá den un lugá cumbiniente pa tur. Nos por tin sigur cu Jehova lo bendicioná nos esfuersonan pa atendé e necesidadnan di hopi ruman.—Heb. 6:10.
6 Podisé e congregacion den su totalidad ta deseá na yuda satisfacé e necesidad pa mas Salon di Reino cu ta crece ketu bai. Si ya boso a paga boso Salon di Reino, e congregacion por dicidí di contribuí un cierto montante tur luna na e Fondo di Sociedad pa Salon di Reino. Por presentá un resolucion al respecto na e congregacion. Despues cu e congregacion aprobá esei, por saca e placa tur luna for di su cuenta di placa cash i mand’é pa Sociedad. Claro cu cualkier congregacion por tuma un resolucion asina, i por manda e montante designá huntu cu e fondonan ricibí for dje caha di contribucion marcá Fondo di Sociedad pa Salon di Reino. Por haci esaki mensualmente, of mes tantu biaha cu e congregacion ta deseá.
7 Participá den e areglo pa yuda otro congregacionnan haña e Salonnan di Reino necesario dor di contribuí na e Sociedad su Fondo pa Salon di Reino, ta un excelente manera pa onra Jehova. (Pro. 3:9) Laga nos oracion constante ta cu Jehova lo sigui bendicioná i dirigí nos esfuersonan den e actividad aki na su alabansa.