Programa di Konstrukshon di Salon di Reino Ta Avansando
1 Na aña 1983, n’e Kongresonan di Distrito “Unidat di Reino” na Merka, a anunsiá formashon di un fondo spesial pa yuda konstruí i remodelá Salon di Reino rònt Merka i Kánada. E tempu ei nos no tabatin niun idea kuantu bendishon un komienso asina chikitu lo a haña. Nos a kuminsá mira na un manera mas kompleto loke Salmo 92:4 ta ekspresá asina bon: “Pasobra abo, o SEÑOR, a hasi mi kontentu ku loke bo a hasi; pa motibu di e obranan di bo mannan lo mi kanta di goso.”
2 Awe nos tin un gran goso den loke ta ser lográ. Aktualmente tin un programa mundial aselerá pa konstrukshon di Salon di Reino andando. Na un manera òf otro, nos tur tin e privilegio di partisipá den e aktividat aki. Nos ta hasi esei ku nos kontribushonnan na sèn, sea grandi òf chikitu, pa yuda finansiá konstrukshon di mas lugá di adorashon rònt mundu. Ademas, hopi ruman ta ofresé nan ekipo, nan tempu i nan abilidatnan pa e tipo di proyektonan ei. Ta danki na Yehova su guia, su apoyo i su bendishon generoso riba nos esfuerso kombiná, ku henter e areglo tin éksito.—Salmo 127:1.
3 Hopi sukursal a apliká e modelo kreá originalmente pa kongregashonnan na Merka. Den hopi pais tin un kaha di kontribushon den Salonnan di Reino kaminda publikadónan por pone nan kontribushonnan pa e Fondo pa Salon di Reino. Na Merka, Nos Ministerio di Reino di mart 1997 a anunsiá un ahuste den e programa aki. El a bisa: “For di dia ku e Fondo di Sosiedat pa Salon di Reino a ser establesé na aña 1983, e rumannan a kontribuí generosamente, di manera ku por a fia kongregashonnan sèn pa nan konstruí Salon di Reino. Ya 2.700 kongregashon den e pais ei a benefisiá dje areglo aki. Hopi kongregashon lo no por a konstruí un Salon di Reino òf renobá unu ku tabatin mester di reparashon, si no tabata pa e fondo. Awor aki tin un nesesidat urgente pa usa parti dje fondonan kontribuí pa duna fiansa na kongregashonnan den paisnan kaminda e situashon ekonómiko ta malu. Tantu Sosiedat komo e kongregashonnan ku lo benefisiá di boso kontribushonnan lo apresiá mashá ku boso ta sigui apoyá e areglo aki.”
4 E anunsio aki a sirbi komo un invitashon pa partisipá den un programa di konstrukshon mas rápido di Salon di Reino. A amplia e Fondo pa Salon di Reino di tal manera ku e por akapará e nesesidat di nos rumannan den otro paisnan, miéntras ku na mes momentu e ta sigui duna fiansa pa konstrukshon di Salonnan di Reino na Merka mes tambe. Un siguiente artíkulo den Nos Ministerio di Reino di ougùstùs 1997 a bisa: “Tin un nesesidat konstante pa konstruí mas Salon di Reino rònt mundu. Djis den e aña di sirbishi ku a kaba, 3.288 kongregashon nobo a ser formá. Hopi dje kongregashonnan aki ta na Áfrika, Asia, Sentro- i Suramérika i Europa Oriental.”
5 Ki resultado tabatin entre tantu? E Anuario 2001 a informá: “Ku e areglo aki, a logra kaba 453 Salon di Reino den 30 pais te asina leu, i tin 727 edifisio mas den konstrukshon. Den kada pais, a konsentrá mas riba diseñonan standarisá pa Salon di Reino ku ta hasi uso di material i método di konstrukshon lokal. Na Kenia nan ta usa piedra kobá den mina; na Togo ta normal pa usa blòki di klei; na Kamerun hopi hende ta traha ku blòki di semènt ku despues nan ta pleistu. Asina e rumannan lokal por desaroyá lihé e abilidatnan ku nan tin mester pa nan kumpli ku nan papel klave dje programa den nan pais.”
6 Na e enorme kontinente afrikano nos por mira evidensia di ku Yehova su bendishon ta riba e programa aki. Ora bo mira e potrètnan di algun dje Salonnan di Reino ku a keda konstruí, imaginá bo e impakto ku e konstrukshonnan ei tabatin riba e obra di Testigunan di Yehova! Esaki ta bisto den tres área diferente: e unidat di nos hermandat mundial, e efekto ku e tabatin riba e komunidatnan lokal, i e oumento di asistensia na reunionnan di kongregashon. E suplemento dje luna aki ta hala atenshon na Salonnan di Reino konstruí na Áfrika, i e siguiente edishonnan di Nos Ministerio di Reino lo konsentrá riba kon e programa di konstrukshon di Salon di Reino ta avansando na otro partinan di mundu.
[Pictures on page 3]
REPÚBLIKA SENTRAL AFRIKANO
Bimbo, Bangui
Begoua, Bangui
[Pictures on page 4]
Ukonga, Tanzania
[Picture on page 4]
Accra, Ghana
[Picture on page 4]
Salala, Liberia
[Picture on page 4]
Karoi, Zimbabwe
[Pictures on page 4, 5]
Allada, Benin—Salon di Reino di ántes
Allada, Benin—Salon di Reino nobo
[Picture on page 5]
Kpeme, Togo
[Picture on page 5]
Sokodé, Togo
[Pictures on page 4, 5]
Fidjrosse, Benin
[Picture on page 6]
Lyenga, Zambia—Salon di Reino di ántes
[Picture on page 6]
Lyenga, Zambia—Salon di Reino nobo
[Picture on page 6]
Kinshasa, Congo
[Picture on page 6]
Musambira, Rwanda