Con Mi Por Laga un Doño di Cas Scuchá Mi?

¹ Den e stad di Filípos, “un cierto muher yamá Lidia, un bendedor di púrpura, . . . tabata scuchando, i Jehova a habri su curason hanchu p’e presta atencion na e cosnan cu Pablo tabata papia.” (Echo. 16:14) Kico e relato aki ta siña nos? Scuchamentu di parti dje doño di cas ta loke ta habri e porta pa un persona siña e berdad. Nos éxito den compartí e mensahe di Reino ta dependé principalmente dje buena boluntad dje doño di cas pa scucha. Una bes nos haña un orea cu kier tende, ta relativamente fácil pa presentá nos mensahe. Pero pa haña un hende pa scucha por ta un desafio. Kico nos por haci?

² Promé cu nos tuma parti den sirbishi, nos mester presta atencion na nos aparencia i na e ekipo cu nos lo bai usa. Pakico? Hende ta mas incliná na scucha un persona cu ta presentá su mes cu dignidad. Nos ta bistí cu bon gustu i tog modesto? Aunke bistimentu slons por ta popular den e mundu, nos ta evitá tal moda descuidá pasobra nos ta ministernan cu ta representá e Reino di Dios. Nos aparencia limpi i nechi ta duna mas testimonio faborabel na e mensahe di Reino cu nos ta predicá.

³ Sea Amigabel i Respetuoso: Apesar di e actitudnan cambiando di awendia, hopi hende ainda tin respet pa Bijbel i lo respondé faborablemente na un combersacion amigabel i respetuoso tocante loke Bijbel ta contené. Un sonrisa caluroso i berdadero por trankilisá e doño di cas i habri caminda pa un consideracion agradabel. Nos sinceridad i bon manera mester ser reflehá tambe den nos abla i conducta, locual ta incluí cu nos ta scucha respetuosamente na e comentarionan dje doño di cas.

⁴ Nos propósito ta di compartí e speransa bíblico cu otro hende. Cu esaki na mente, nos mester haci sigur cu nos combersacion ta atractivo, no na un forma di discusion of na moda desafiante. No tin mester di perde tempu discutiendo cu un persona cu ta claramente contra. (2 Tim. 2:23-25) Nos por scoge for di un variedad amplio di presentacionnan animador i oportuno cu ta ser percurá pa nos den Nos Ministerio di Reino i den e buki Razonamiento. Naturalmente, nos mester prepará esakinan bon di manera cu nos por papia den un manera caluroso i convincente.​—⁠1 Ped. 3:15.

⁵ Despues di nos bishita inicial, poco doño di cas por corda exactamente kico nos a bisa. Sin embargo, casi tur di nan por corda e manera cu nos a papi’é. Nunca nos mester balotá e poder di bondad i amabilidad. Siguramente tin hopi hende semehante di carné den nos teritorio cu lo presta un oido scuchador na e berdad mescos cu Lidia a haci den e promé siglo. Dunando atencion cuidadoso na nos aparencia i manera di papia por animá esnan sincero pa scucha na e Palabra di Dios i ricibi’é faborablemente.​—⁠Mar. 4:20.