Sirbi cu Henter Bo Alma!
1 Nos tin un cantidad di motibu pa ta gradicidu na Jehova. Esakinan ta incluí loke el a haci den pasado, loke e ta haciendo awor aki mes, i loke lo e haci ainda pa nos den futuro. Kico nos gratitud mester impulsá nos pa haci? Un salmo di David ta contestá: “Lo mi bendicioná Jehova na tur ocasion; constantemente su alabansa lo ta den mi boca.”—Sal. 34:1.
2 Bijbel ta mustra claramente cu nos ta ser mandá pa predicá. Esaki ta un trabou cu nos ta efectuá ‘cu henter nos alma como pa Jehova.’ (Col. 3:23) Cuantu nos lo haci den e ministerio si nos berdaderamente ta sirbi cu henter nos alma? Ora nos pensa riba e amor cu Jehova a mustra pa cu nos, siguramente nos curason lo impulsá nos pa tin un participacion celoso den conta otronan tocante dje i su propósitonan precioso! Nos ta ser impulsá pa haci loke nos por.
3 Razonablemente por spera cu un persona cu ta sirbi cu henter su alma lo kier mantené su atencion enfocá riba sirbishi sagrado. E salmista, kende obviamente a sinti asina, a declará: “Shete biaha pa dia mi a alabá bo.” (Sal. 119:164) Esnan cu ta compartí e sintimentunan dje salmista ta busca manera pa probechá di oportunidadnan pa alabá Jehova. Segun nan circunstancianan ta permití, nan ta sirbi celosamente te na e grado posibel.
4 Nos Ta Rondoná cu Oportunidadnan pa Alabá Jehova: Nos no tin cu warda te ora nos ta participando den e trabou di cas-pa-cas pa predicá e bon nobo. Nos coleganan di trabou, compañeronan di scol, famia i conocínan, tur tin cu tende e mensahe di Reino. Ora nos ta biahando, nos por cuminsá combersacionnan cu por hiba na dunamentu di testimonio na personal di hotel, trahadornan na restaurant, trahadornan na pomp di gasolin, of shofernan di taxi. Ora nos ta na cas, nos por testificá na bisiñanan of hende cu ta entregá cos. Si nos ta hospitalisá, tin verpleegster, dokter i otro pashentnan na ken nos por predicá informalmente.
5 Testificacion Informal Ta Duna Resultado: Dos Testigo tabata canando den un parke riba un dia i a cuminsá un combersacion cu un homber hóben kende tabata keiru cu su yu. Cu tempu e homber i su esposa a aceptá e berdad. Mas despues e homber hóben a revelá cu djis un poco ratu promé cu el a topa e dos Testigonan, el a haci oracion na Dios, pidiendo, ‘Si bo ta existí, por fabor lagá mi conocé bo.’ E ta considerá e encuentro den e parke di ta Jehova su contesta na su oracion.
6 Esnan cu ta deseá di henter alma pa yuda otro hende spiritualmente ta experenciá gran goso. Nan sa cu tal sirbishi, “cu un curason completo,” ta agradá Jehova.—1 Cró. 28:9.