Ken Ta Cualificá pa Predicá?
1 Relacioná cu e ministerio, bo a yega di sinti manera Moises? El a bisa: “Dispensá mi, Jehova, pero mi no ta un orador vlot, ni desde ayera ni desde promé cu esei ni desde cu bo a papia cu bo sirbidor.” (Ex. 4:10) Si bo ta sinti asina, bo por ta incliná na keda sin predicá. Sin embargo, Jesus “a manda nos pa predicá na e pueblo i pa duna un testimonio cabal.” (Echo. 10:42) Pues con nos ta bira predicadornan cualificá dje bon nobo?
2 No ta e grado di nos educacion seglar ta cualificá nos pa e ministerio. Pablo a bisa cu “no hopi hende sabí na moda carnal a ser yamá” i cu “e sabiduria dje mundu aki ta bobedad cerca Dios.” (1 Cor. 1:26; 3:19) Jesus a scoge su apostelnan for di entre e clase trahador—por lo ménos cuater di nan tabatin ofishi di piscadó. E lidernan religioso orguyoso cu desprecio a considerá nan como “hombernan ineducá i gewoon.” Husgá segun normanan mundano, e apostelnan no tabata cualificá pa predicá. Sin embargo, Pedro su discurso maestral duná riba e dia di Pentecoste a impulsá 3.000 hende pa bautisá!—Echo. 2:14, 37-41; 4:13.
3 Jehova Ta Cualificá Nos pa Predicá: Pablo a declará: “E echo cu nos ta adecuadamente cualificá ta bini di Dios.” (2 Cor. 3:5) Jehova, e Fuente di sabiduria, a siña miyones di hende pa predicá e berdad di Reino na otronan. (Isa. 54:13) E eficacia i productividad dje trabou aki por ser mirá den e 338.491 personanan cu a ser bautisá aña pasá como ‘cartanan bibu di recomendacion.’ (2 Cor. 3:1-3) Nos tin tur motibu pa predicá cu curashi i conviccion tocante e cosnan cu nos a siña di Jehova.
4 E organisacion di Dios a establecé un programa internacional di entrenamentu pa ministernan. Mediante e Scritura i un gran variedad di yudansa pa studio bíblico, nos ta ser educá i entrená pa bira “plenamente competente, completamente ekipá” pa predicá. (2 Tim. 3:16, 17) Hopi hende a keda impresioná cu e nivel científco hañá den e publicacionnan di Sociedad. Por ehempel, un revista sueco a declará: “Tras dje fe cu ta ser predicá dor di Testigonan di Jehova tin un nivel académico i un intelectualidad bíblico remarcablemente haltu i internacionalmente orientá.”
5 Cu e guia duná den nos cincu reunionnan semanal, nos programa di lesamentu i studio di Bijbel, consehonan ricibí den e Scol di Ministerio Teocrático, yudansa personal for di otronan cu ta ministernan cu experencia, i mas cu tur cos, cu e respaldo di Jehova su spiritu santu, nos por tin confiansa cu Jehova ta mira nos como plenamente cualificá pa predicá. “Sí, como mandá di Dios, bou di bista di Dios, den compania di Cristo, nos ta papia.”—2 Cor. 2:17.
6 Si nos probechá plenamente dje entrenamentu teocrático cu Dios ta percurá mediante su organisacion, nos no tin motibu pa keda sin predicá of sinti nos intimidá. Nos por predicá gososamente na otronan, siendo sigur cu Jehova lo bendicioná nos esfuersonan.—1 Cor. 3:6.