“Haci Boso Sumo Posibel”
1 Ora nos a dedicá nos mes na Jehova, nos a primintí di dun’é lo mihó di nos. Apropiadamente, apostel Pedro a animá cristiannan di promé siglo pa haci nan sumo posibel den haci sigur di nan posicion dilanti Jehova. (2 Ped. 1:10) Nos sigur kier haci nos sumo posibel pa agradá Jehova ora di sirbié awe. Kico esaki ta encerá? Segun nos relacion cu Jehova ta bira mas íntimo i nos ta meditá riba tur loke el a haci pa nos, nos curason ta impulsá nos pa semper haci lo mihó cu nos por den su sirbishi. Nos kier mehorá e calidad i, caminda ta posibel, aumentá e cantidad di nos ministerio.—Sal. 34:8; 2 Tim. 2:15.
2 Un ruman homber hóben cu kier a haci mas den e ministerio a haña cu un studio regular dje Palabra di Dios a profundisá su aprecio pa Jehova i a inculcá den dje mayor celo. Esaki a motiv’é pa aplicá p’e sirbishi di pionero. Un ruman muher cu tabata hañ’é difícil pa papia cu hende desconocí a practicá algun dje presentacionnan dje buki Razonamiento i pronto a cuminsá haña mayor éxito den su ministerio. El a haña chens di conducí un studio di Bijbel cu un pareha cu a aceptá e berdad.
3 Alegrá den Loke Bo Por Haci: Algun di nos ta haña nos den circunstancianan difícil manera mal salú, oposicion di famia, pobresa of apatia den e teritorio. Hopi otro problema cu ta comun den e último dianan aki lo por stroba nos sirbishi. (Luc. 21:34, nota; 2 Tim. 3:1) Esaki ta nificá cu nos a fracasá den nos dedicacion na Jehova? No si nos ta sirbiendo e haciendo nos sumo posibel.
4 No ta sabí pa husga nos mes a base di loke otronan por logra. En bes di esei, e Scritura ta animá nos pa “laga cada un duna prueba di loke su mes trabou ta.” Ofreciendo nos sirbishi plenamente te na e grado cu nos personalmente por, ta agradá Jehova i ta duna nos “motibu pa hubilá.”—Gal. 6:4; Col. 3:23, 24.
5 Laga nos obedecé Pedro su palabranan pa ‘haci nos sumo posibel pa ser hañá finalmente pa Dios sin mancha i sin defecto i na pas.’ (2 Ped. 3:14) E spiritu ei lo duna nos un sintimentu di siguridad i un pas mental cu solamente Jehova por duna.—Sal. 4:8.