Demostrá Interes Genuino den Tur Esnan Interesá
1 E proclamacion mundial dje Reino pronto lo yega na un fin, despues di cua tur esnan “cu no conocé Dios” lo sufri destruccion. (2 Tes. 1:7-9) Pues, interes genuino pa e bida di otronan ta impulsando e pueblo di Jehova pa alcansá mas tantu hende posibel cu e mensahe di Reino.—Sof. 2:3.
2 Tur luna ta dedicá miyones di ora buscando pa haña esnan cu kier tende “bon nobo di algu mihó.” (Isa. 52:7) Reaccionando riba e oferta actual di literatura, hopi persona a aceptá copianan of abonament riba E Toren di Vigilancia i Spierta! of e foyeto Kico Dios Ta Rekerí di Nos? Interes genuino den e hendenan aki mester impulsá nos pa sigui haci esfuerso pa desaroyá e interes di tur persona cu mustra esaki.—Pro. 3:27.
3 Tene Registronan Exacto: Lo bo logra mas si bo tene un registro completo i exacto di personanan interesá i di loke bo a laga. Informacion manera e nomber i adres dje doño di cas, dia i ora cu bo a pasa, literatura lagá, i e tópico cu boso a considerá lo yudá bo ta mas eficas ora bo bolbe bek. Tambe, si bo skirbi algun dje comentarionan cu e doño di cas a haci durante bo promé bishita, lo bo por referí na nan eficasmente ora bo reanudá e consideracion n’e rebishita.
4 Haci Rebishita Unbes: Cuantu di esnan cu a aceptá literatura cerca bo luna pasá bo a purba bishitá atrobe? Simannan a pasa bai sin ningun contacto mas? Interes genuino den nan bienestar eterno mester impulsá bo pa bolbe bek mas pronto posibel, preferiblemente dentro di un par di dia, di manera cu e combersacion ainda lo ta frescu den mente. Dor di bolbe bek unbes pa stimulá nan interes, lo bo por stroba Satanas su esfuersonan promé cu e “bini i ta kita e palabra cu a ser sembrá den nan.”—Mar. 4:15.
5 Preparacion Ta Esencial: Bo eficacia den hacimentu di rebishita ta dependé directamente di con bon bo ta prepará. Planea bo introduccion promé cu bo bai hacié. E último página di Nos Ministerio di Reino di april 1997 ta duna vários presentacion cu por ser usá cu bon éxito ora bo ta ofrecé e revistanan of e foyeto Rekerí. E siguiente cos ta pa tin algun pensamentu na mente pa compartí ora bo bolbe bek. Kico bo por bisa ora bo bai bek cerca un persona cu a mustra interes? Con por cuminsá un studio di Bijbel?
6 Ora bolbe bek pa sigui un consideracion en cuanto kico lo tin cu haci pa limpia e tera i hacié un mihó lugá pa biba, lo bo por bisa:
◼ “Na mi bishita anterior, nos a bai eens cu mester dal pasonan drástico promé cu por transformá e tera den un paradijs pacífico. Bo ta kere cu hende tin e abilidad pa logra esaki? [Permití contesta.] Por fabor, tuma nota pakico lo ta necesario pa Dios intervení den asuntu di hende.” Lesa Salmo 37:38. Despues bai na les 5 dje foyeto Rekerí, i usa porcionnan selectá di §4-5 pa mustra con Dios lo cumpli cu e profecia aki. Concluí dor di ofrecé un studio di Bijbel usando e foyeto.
7 Si bo a considerá e Reino di Dios i a laga e foyeto “Rekerí” na bo bishita inicial, ora bo regresá lo bo por bisa algu asina aki:
◼ “Ultimo biaha cu nos a papia, nos a identificá e Reino di Dios como un berdadero gobiernu cu lo goberná henter e tera. Bijbel ta mustra cu Cristo Jesus lo ta su gobernante. Ki beneficio bo por pensa cu lo tin teniendo e clase di gobernacion i lider aki?” Permití contesta. Habri e foyeto Rekerí na les 6. Usando puntonan selectá for di §6-7 i e plachi na página 13, mustra kico e Reino di Dios lo haci pa humanidad den futuro. Lesa Daniel 2:44, i si ta apropiado, introducí e buki Conocimentu i ofrecé un studio di Bijbel.
8 Si bo a topa un persona cu a reconocé cu religionnan di mundu a crea problemanan pa humanidad, lo bo por puntra esaki n’e rebishita:
◼ “Bo a yega di puntra bo mes con nos por sa cua religion tin Dios su aprobacion? [Permití contesta.] E foyeto aki Kico Dios Ta Rekerí di Nos? ta duna e marcanan di identificacion di religion berdadero.” Bai na les 13, i resaltá e cincu puntonan cursivo den §3-7. Bo por sigui bisando: “Ademas di haña e religion berdadero, nos mester haña sa kico Dios ta rekerí di nos individualmente.” Lesa Juan 4:23, 24. Ofrecé pa considerá esaki mas aleu. Bai na les 1 den e foyeto, i demostrá con nos ta studia.
9 Ora bo ta bolbe pa sigui un consideracion tocante felicidad den famia, lo bo por bisa algu parecido na lo siguiente:
◼ “Promé biaha cu nos a topa, mi a compartí cu bo e secreto pa felicidad den famia, esta, aplicá e conseho hañá den e Palabra di Dios, e Bijbel. Ora ta trata di atendé n’e necesidadnan di un famia djawendia, bo ta kere cu Bijbel ta anticuá of al dia?” Permití contesta. Presentá e buki Conocimentu. Bai na capítulo 2, i lesa e cita di un educador den §13. Usando e puntonan den §3, ofrecé un studio di Bijbel di famia.
10 Dor di tene registronan exacto, haci preparacion esencial, i bolbe bek unbes pa sigui desaroyá nan interes, nos por demostrá e clase di amor pa próhimo cu lo atraé nan n’e caminda di salbacion.—Mat. 22:39; Gal. 6:10.