Studionan di Bijbel cu Ta Producí Disipel
1 “Kico ta impedí mi di bautisá?” e eunuco etiopio a puntra, despues cu Felipe “a declará na dje e bon nobo tocante Jesus.” (Echo. 8:27-39) Den caso dje eunuco, e tabatin un amor pa e scrituranan inspirá di Dios caba, i despues di a ricibí yudansa spiritual for di Felipe, e tabata cla pa bira un disipel. Pero no ta tur hende ta convencí cu nan tin cu examiná e Scritura pa nan mes.
2 Afortunadamente, e organisacion di Jehova a percurá e foyeto nobo, Un Buki pa Tur Hende, pa animá hende examiná e mensahe cu Bijbel tin pa nos dia. E informacion den e foyeto lo mester atraé hende sincero cu tal bes ta educá, pero cu sa poco dje Bijbel. E foyeto excelente aki ta diseñá pa impulsá hende pa examiná e Bijbel.
3 Ora di cuminsá un studio di Bijbel, lo ta útil pa repasá e sugerencianan excelente publicá den e suplemento di Nos Ministerio di Reino di juni 1996, en cuanto con por conducí un studio productivo for dje buki Conocimentu. Den transcurso dje studio, considerá e progreso cu e studiante ta haci pa asina bo por determiná cua áreanan tin mester di mas atencion. Animá e studiante pa prepará su lesnan di antemano i busca e textonan. Comentarionan cu e haci cu su mes palabra por reflehá su aprecio sincero pa e berdad. Generalmente esnan cu ta lesa otro publicacionnan mas di Sociedad i cu regularmente ta asistí na reunionnan di congregacion, ta haci progreso rápido. Animá e studiante p’e papia informalmente cu otronan tocante loke e ta siñando. Mustr’é bondadosamente loke e tin cu haci pa progresá spiritualmente. Nos no mester conducí studionan indefinidamente cu hende indeciso. Studiantenan mester tuma e iniciativa pa siña, tuma un posicion firme na fabor dje berdad i progresá den direccion di dedicacion i bautismo.
4 Den algun famia, ta conducí mas cu un studio, como cu diferente miembro di famia tin studio apart. Sin embargo, den mayoria caso lo ta preferibel pa por tin un studio di famia uní, siendo cu esaki lo yuda uni e famia spiritualmente.
5 Jesus a manda pa nos bai i haci disipel. (Mat. 28:19) Pa haci esei, nos mester conducí studionan di Bijbel cu ta yuda studiantenan progresá te n’e punto cu nan lo por puntra: “Kico ta impedí mi di bautisá?”