Revistanan Ta Anunciá e Reino
1 Como Testigo di Jehova, nos ta bon conocí pa nos predicacion celoso tocante e Reino di Dios. E revistanan Toren di Vigilancia i Spierta! cu nos ta distribuí ta hunga un papel poderoso den yuda miyones di hende siña tocante e propósitonan di Dios. E mensahe cu nan ta contené en berdad ta bon nobo, pasobra nan ta anunciá e Reino celestial di Dios como e único speransa pa humanidad.
2 E revistanan ta trata cu e berdadero necesidadnan di hende: emocional, social i spiritual. Awor cu normanan moral i di famia ta cayendo den otro na tur parti, E Toren di Vigilancia i Spierta! ta yuda hende mehorá nan calidad di bida dor di mustra nan con pa aplicá principionan bíblico. Lo ta un placer pa nos presentá e revistanan aki durante april cu mei.
3 Nan Ta Realmente Atraé Hende: E Toren di Vigilancia i Spierta! ta disponibel den e idiomanan di casi henter e poblacion di mundu. Debí na esaki, nos revistanan ta bon conocí. Ata aki algun motibu pakico hende ta ser atraí na nan:
◼ Como revistanan di integridad i berdad, nan ta mustra claramente e diferencia entre bon i malu.
◼ Nan ta duna speransa di un binidero paradijs hustu, basá riba e promesa di Dios di trece e tera bou di su gobernacion di Reino.
◼ Nan ta presentá un variedad amplio di tema oportuno, cu ta atraé hende di tur antecedente i cultura.
◼ E artículonan ta corticu, educativo, basá riba echo i liber di prehuicio i compromiso.
◼ E plachinan yamativo ta lanta interes mesora, i e estilo simpel cu nan ta skirbí ta haci e revistanan fácil pa lesa.
4 Distribuí Nan Tur Caminda: Un bon distribucion di revista ta dependé pa gran parti di con diligente nos ta den prepará nos presentacionnan, programá nos tempu i organisá nos actividad di predicá. Lo ta bon pa repasá i aplicá e sugerencianan práctico cu Nos Ministerio di Reino a ofrecé den e edicionnan di september 1995 i october 1996.
5 Familiarisá Bo Mes cu e Revistanan: Segun bo ta lesa cada edicion, pensa riba un persona cu lo apreciá di haña un ehemplar. Tuma nota di puntonan specífico of textonan bíblico cu bo por cita den bo presentacion. Pensa riba un pregunta cu bo por haci pa iniciá un combersacion i stimulá interes den e tema.
6 Adaptá e Presentacion na e Persona: Prepará un presentacion simpel i flexibel cu bo por ahustá na un homber, un muher, un persona di mas edad of un hóben, sea e persona ta un hende conocí of desconocí.
7 Sea Cla pa Laga E Toren di Vigilancia i Spierta!: Como cu e revistanan ta pas fácilmente den un sacu di man, un tas of sacu di paña, nos por tin algun huntu cu nos ora nos ta bai di biahe of di compra. Ofrecé nan ora nos ta papia cu famia, bisiña, colega, compañero di scol of maestronan. Apartá un dia pa siman pa predicá cu revista.
8 Mustra Aprecio pa e Revistanan: Nunca nan ta perde nan balor. Pasamentu di tempu no ta reducí e balor dje mensahe cu nan ta contené. Naturalmente, si nos haci un esfuerso special pa laga tur e revistanan cu nos tuma, no tin nodi pa edicionnan bieu acumulá riba nos reki.
9 Testificacion Riba Caya Ta Eficas: Esaki ta un dje mihó maneranan pa ofrecé e revistanan na un gran cantidad di hende. Algun publicadó ta traha cayanan druk regularmente riba dianan di compra.
10 Teritorio di Negoshi Ta Productivo: Ora di testificá di negoshi pa negoshi, nos tin tiki no-na-cas. Mayoria hende di negoshi ta cortes, i hopi ta aceptá e revistanan gustosamente. Presentá artículonan cu ta apropiado pa e cierto negoshi cu bo ta bishitá.
11 Rutanan di Revista Tin Potencial: Como cu e revistanan ta sali kincenalmente, di mes ta apropiado pa bolbe bek cerca e hendenan cu ta lesa nan i presentá e siguiente edicionnan. Nos tin cu bolbe bek regularmente, no solamente pa laga revista, sino tambe pa desaroyá e persona su interes den Bijbel. Rutanan di revista ta un fuente excelente pa potencial studionan di Bijbel.
12 Saca Lo Máximo di April i Mei: E Toren di Vigilancia i Spierta! a gana e confiansa di miyones di lector apreciativo. Nan ta asina eficas den anunciá e Reino cu nos mester haci un esfuerso special pa nos tin nan huntu cu nos i ofrecé nan na tur oportunidad. Laga e lunanan di april i mei resultá di ta lunanan sobresaliente pa loke ta distribucion di revista.