Un Bishita cu Por Ta un Bendicion
1 Tabata cu gran alegria cu Zakeo a ricibí Jesus como huésped den su cas. I ki un bendicion e bishita ei a resultá di ta!—Luc. 19:2-9.
2 Awe Jesucristo, como Cabes dje congregacion, ta manda e ancianonan pa “pastoreá e tou di Dios.” (1 Ped. 5:2, 3; Juan 21:15-17) Ademas di duna siñansa na reunion i hiba delantera den sirbishi di veld, e superintendentenan dje congregacion ta percurá yudansa personal cu amor na miembronan individual dje congregacion. P’esei, de bes en cuando bo por anticipá pa ricibí atencion personal for dje ancianonan, sea na bo cas, na Salon di Reino, miéntras boso ta huntu den sirbishi di veld of na otro ocasionnan. Bo mester tin miedu dje bishita dje ancianonan? Sigur cu no. E echo cu nan ta bishitá bo no kier men cu bo ta fayando den un of otro cos. Kico anto, ta e propósito di un bishita di pastoreo?
3 Pablo a bisa cu e kier a bishitá e rumannan ‘pa mira con a bai cu nan.’ (Echo. 15:36) Sí, como wardadó amoroso, e ancianonan ta masha interesá mes pa sa con ta bai cu bo. Nan kier ofrecé yudansa spiritual cu por ta útil i edificante pa bo. Nos amoroso Wardador Jehova ta deseá pa nos cada un ricibí un cuido personal asina.—Eze. 34:11.
4 Ricibí Bishita dje Ancianonan cu Gustu: Pablo su meta pa bishitá e rumannan tabata pa ‘compartí cu nan algun don spiritual pa nan por ta hací firme, i pa por tin un intercambio di estímulo.’ (Rom. 1:11, 12) Nos tur tin mester di estímulo spiritual den e último dianan trabahoso aki, i nos tin mester di yudansa pa sigui firme den e fe. Bo reaccion positivo pa cu un bishita di pastoreo lo resultá sin duda den un excelente intercambio di estímulo.
5 Apreciá e hopi beneficionan cu bo por saca for dje ancianonan su trabou di pastoreo. Si tin un asuntu of pregunta cu ta preocupá bo, corda cu e ancianonan t’ei den e congregacion pa yuda. No vacilá pa papia cu nan tocante cualkier asuntu cu por ta afectando bo bienestar spiritual. Apreciá e areglo amoroso aki di Jehova, i alegrá den e bendicionnan cu un bishita asina por trece.