Intensificá e Testimonio Segun cu e Fin Ta Yega Cerca
1 Temporada di cosecha ta un tempu gososo. I tambe e ta un tempu pa traha duru. Tin un tempu limitá pa recogé e cosecha. E trahadónan no mag di ta floho den nan trabou.
2 Jesus, papiando figurativamente, a compará “conclusion di un sistema di cosnan” cu un tempu di cosecha. (Mat. 13:39) Nos ta bibando den e conclusion dje sistema di cosnan aki, i a resta un tempu limitá pa duna un testimonio “den tur e tera habitá.” (Mat. 24:14) Segun cu e fin ta yega cada bes mas cerca, nos tin cu intensificá nos participacion den e ministerio. Di con? Jesus a splica: “E cosecha ta grandi, pero e trahadónan ta poco.”—Mat. 9:37, 38; Rom. 12:11.
3 Ocupá Bo den dje cu Urgencia: Ora Jesus a cuminsá su gran trabou di predicá, e tabatin tres aña i mei so pa cumpli cu loke a asign’é. El a predicá cu un sentido di urgencia, bisando: “Mi tin cu declará e bon nobo dje reino di Dios, pasobra ta pa esaki mi a ser mandá.”—Luc. 4:43.
4 Jesus a inculcá e mésun sentido di urgencia den su disipelnan. (Mar. 13:32-37) Ta p’esei “tur dia den e tempel i di cas pa cas nan a sigui sin stop siñando i declarando e bon nobo tocante e Cristo, Jesus.” (Echo. 5:42) Actividadnan di ménos importancia no tabatin prioridad den nan bida. Pa tiki cu nan tabata, tog nan a logra predicá e bon nobo “den tur creacion cu ta bou di shelu.”—Col. 1:23.
5 Tin motibu asta mas fuerte pa nos cultivá e mésun sentido di urgencia ei awor, segun cu “e fin di tur cos a yega cerca.” (1 Ped. 4:7) Jehova a fiha un dia i ora pa e fin dje sistema di cosnan aki. (Mat. 24:36) Lo finalisá e trabou di predicá den e tempu cu a resta. Ta p’esei nos ta sigui aumentá nos esfuersonan pa alcansá mas i mas hende cu e bon nobo.
6 Dor di intensificá nos participacion den e trabou di duna testimonio segun cu e fin ta yega cerca, nos lo tin e satisfaccion di bisa Jehova, mescos cu Jesus: ‘Nos a terminá e trabou cu bo a duna nos pa haci.’—Juan 17:4.