“Predicá e Palabra . . . Urgentemente”
1 Si bo ricibí algu cu tin “URGENTE” marcá riba dje, con bo ta consider’é? E palabra “urgente” ta nificá “rekerí atencion inmediato.” Cu bon motibu anto, apostel Pablo a instruí cristiannan pa “predicá e palabra . . . urgentemente.” (2 Tim. 4:2) Bo ta respondé dor di duna e trabou aki bo atencion inmediato?
2 Por ta cu Pablo a haña informacion cu algun di su rumannan tabata desplegá un tendencia di ta ‘floho den nan trabou’ como cristian. (Rom.12:11) Esaki a limitá e fruta di nan trabou i tambe e goso cu nan lo por a saca dor di yuda otro hende.
3 Jesus Su Punto di Bista dje Ministerio: Esta un deleite Jesus tabatin den cumpli cu su ministerio! E di: “Mi cuminda ta pa mi haci e boluntad di esun cu a manda mi i terminá su trabou.” Jesus su ehempel a motivá su disipelnan, kendenan el a animá dor di bisa nan cu ‘e cunucunan ta blancu pa cosechá.’ (Juan 4:34, 35) E sentido di urgencia cu el a desplegá durante henter su ministerio tabata bisto ora el a bisa su disipelnan “roga e Doño dje cosecha pa manda trahadó na su cosecha.” (Mat. 9:38) Jesus a comprendé cu su comision tabata pa predicá, i e tabata decididu pa no laga nada strob’é di cumpli cuné.
4 Ke Tal di Nos? Awe, tin mas urgencia cu nunca pa sigui padilanti cu e trabou di predicá. Den hopi parti di mundu e cunucunan ta cla pa cosechá. Asta den paisnan caminda ta parce cu a duna un testimonio cabal, miles di hende ta bautisá tur aña. Ya cu e fin dje sistema di cosnan aki ta acercando rápidamente, tin “hopi di haci den e trabou di Señor.” (1 Cor. 15:58) Mas cu na cualkier otro tempu, ta vital pa nos haci esfuerso vigoroso pa compartí e mensahe di Reino cu otronan.
5 Laga nos ta completamente ocupá den e trabou di alcansá otro hende cu e bon nobo, tantu di cas pa cas como na tur otro caminda cu nos por haña hende den e teritorio. Dor di participá mas pleno posibel den e trabou di predicá, nos ta demostrá bon cla cu nos a pone e Reino na promé lugá den nos bida. (Mat. 6:33) Nos fieldad den predicá e palabra cu urgencia lo duna nos hopi goso.