Con Miembronan di Famia Ta Cooperá pa un Pleno Participacion—Den e Ministerio
1 Kico por ta mas conmovedor cu mira esposo cu esposa, mayor cu yu trahando huntu den e ministerio cristian, alabando e nomber di Jehova públicamente? (Sal. 148:12, 13) Tur famia mester tin un bon rutina pa participá cu regularidad den sirbishi di veld. Bo famia tin un dia fiho tur siman pa participá den e ministerio? Si ta asina, anto tur hende sa exactamente kico nan tin cu prepará p’e i nan por tin un pleno participacion.—Pro. 21:5a.
2 Promé cu e dia di sirbishi dje famia, pakico no hacié un proyecto en conhunto pa prepará e presentacionnan cu bo famia lo bai usa? Sesionnan pa ensayá por ta masha útil, i nan por fomentá un berdadero spiritu di cooperacion familiar. Esta recompensador e ta ora e ministerio di veld ta un asuntu di famia i tur e miembronan ta bon prepará!
3 Un superintendente biahero a compañá henter un famia den e actividad di revista. Miéntras cu e tabata traha di cas pa cas cu un dje yu muhernan, e mucha muher a puntr’é: “Te ki ora ruman ta bai traha cu mi?” Anto e yu muher a splica cu despues e ta bai traha cu su tata. Tabata bisto cu e cu su tata tabata ègt disfrutá di nan sirbishi huntu. Esta un excelente spiritu di famia!
4 Algun famia tin e posibilidad di traha pionero auxiliar huntu un bes pa aña. Of por ta posibel pa por lo ménos un miembro dje famia sirbi continuamente como pionero auxiliar of asta inscribí como pionero regular. Cu bon organisacion i cooperacion, kisas tur e miembronan dje famia di cas lo por aumentá nan participacion personal den sirbishi dor di apoyá esun cu ta traha pionero. E famia sigur lo ser bendicioná cu e aumento aki den actividad i dor dje bon experencianan cu nan ta ricibí den e ministerio.—Mal. 3:10.
5 Un pleno participacion den e trabou di evangelisá lo yuda tene famianan uní cu otro, celoso, productivo i felis den e sirbishi di Jehova!—Compará cu Filipensenan 2:1, 2.