Preparacion di Antemano Ta Duna Goso
1 Participá den e ministerio di veld ta duna nos hopi goso. (Sal. 89:15, 16) Claro cu preparacion ta un factor clave pa nos por experenciá e goso ei plenamente. Mas mihó nos prepará, mas nos ta logra, i mas nos logra, mas grandi nos goso ta.
2 Usa e Hermentnan cu Nos Tin: Cuminsá bo preparacion cu lesa i analisá e informacion den Nos Ministerio di Reino. Hopi bes e ta duna presentacionnan bon pensá, cu ta diseñá pa yuda bo presentá e mensahe di Reino den un manera fácil i eficas. Lo bo haña ehempel di maneranan con pa vence obhecionnan comun. E ta ofrecé ideanan specífico en cuanto con pa haci rebishita eficas, cu e meta pa cuminsá un studio di Bijbel. Bo ta liber pa adaptá e sugerencianan aki di tal manera cu bo ta sinti bo cómodo ora di usa nan. Ademas, bo tin e foyeto chikitu Con pa Cuminsá i Continuá Consideracionnan Bíblico (of e buki Razonamiento), cu ta duna un variedad amplio di introduccion i tambe di contesta riba expresionnan cu por para combersacion. Nan por yuda bo trata mas eficas cu hopi situacion cu bo ta topa.
3 Pasa dor dje publicacion cu bo kier ofrecé, i scoge un of dos punto di interes special cu bo por mustra e doño di cas. Pa cuminsá un combersacion, lo bo por usa un noticia cu bo a tende of lesa di dje, cu ta pone hende para pensa. Anticipá obhecionnan comun cu casi sigur lo bo topa, i pensa di antemano riba algun cos cu lo bo por bisa como contesta. Anto tuma un par di minuut pa ensayá loke bo ta bai bisa na porta.
4 Asistí na Tur Reunion di Sirbishi: Scucha atentamente durante e Reunion di Sirbishi ora ta considerá, repasá i demostrá e sugerencianan for di Nos Ministerio di Reino. Haci nota di ideanan cu bo ta pensa cu lo bo por usa den bo presentacion. Corda riba algun dje situacionnan comun cu bo sa topa den e ministerio, i pensa riba maneranan cu bo por duna testimonio mas eficas. Papia tocante e cosnan aki cu otro publicadónan promé i despues di reunion.
5 Bo por tin sigur cu si bo ta “prepará pa tur bon obra,” lo bo ricibí e recompensa di tin mayor goso i éxito den yuda otro hende haña e caminda cu ta hiba na bida.—2 Tim. 2:21.