“Sirbi SEÑOR ku Goso”
1 Apòstel Pablo a skirbi: “Regosihá den Señor semper; atrobe lo mi bisa, regosihá!” (Fil. 4:4) E privilegio di kompartí e bon nobo i yuda hende ku kualidatnan di karné adorá Yehova ta un fuente di gran goso. (Luk. 10:17; Echo. 15:3; 1 Tes. 2:19) Sin embargo, kiko nos por hasi si de bes en kuando nos sinti ku nos no tin goso den nos sirbishi?
2 Un Trabou Ku Dios A Manda: Kòrda ku ta Yehova a duna nos e tarea pa prediká. Sí, ta un gran privilegio di por ta ‘kolaboradó di Dios’ den e obra di proklamá e mensahe di Reino i hasi disipel! (1 Kor. 3:9) Kristu Hesus ta huntu ku nos den un trabou ku lo no ripití nunka mas. (Mat. 28:18-20) E angelnan tambe ta aktivo den e trabou, i nan ta yuda nos den e gran kosecha spiritual ku ta tumando lugá awor. (Echo. 8:26; Rev. 14:6) E Skritura, huntu ku loke e pueblo di Dios ta eksperensiá, sin duda ta duna evidensia ku Yehova ta apoyá e trabou aki. P’esei, ora nos ta prediká nos ta hasi esei ‘den kompania di Kristu, dilanti Dios, manera hòmbernan mandá dor di Dios.’ (2 Kor. 2:17) Esta un motibu sólido pa goso!
3 Pa nos mantené nos goso den e sirbishi di Dios, orashon ta esensial. (Gal. 5:22) Dor ku ta ku Dios su forsa so nos por hasi su trabou, nos tin ku rog’é pa su spiritu, lokual e ta duna generosamente na esnan ku pidié. (Luk. 11:13; 2 Kor. 4:1, 7; Efe. 6:18-20) Si nos ta hasi orashon tokante nos ministerio, esei lo yuda nos mantené e punto di bista korekto ora nos haña nos ku reakshonnan negativo. Tambe orashon lo yuda nos sigui prediká ku kurashi i ku goso.—Echo. 4:29-31; 5:40-42; 13:50-52.
4 Prepará Bon: Un manera práktiko ku nos por oumentá nos goso den sirbishi ta dor di prepará bon. (1 Ped. 3:15) E preparashon ei no tin nodi tuma hopi tempu. Den djis un par di minüt bo por repasá e presentashonnan sugerí pa ofresé e revistanan òf presentashonnan ku ta pas ku e literatura ku bo ta plania pa ofresé. Pa un introdukshon apropiá, bo por konsultá e buki Rasonamentu òf edishonnan anterior di Nos Ministerio di Reino. Algun publikadó di Reino ta haña ku ta bon pa skirbi un presentashon breve riba un pida papel. Tempu-tempu nan ta djis repasá e papel pa refreská nan memoria. Esaki ta yuda nan dominá nan nervionan i ta duna nan konfiansa pa prediká ku kurashi.
5 Goso ta resultá den hopi benefisio. Un disposishon gososo ta hasi nos mensahe mas atraktivo. Goso ta duna nos e fortalesa pa perseverá. (Neh. 8:10; Heb. 12:2) Riba tur kos, nos sirbishi gososo ta glorifiká Yehova. P’esei, laga nos “sirbi SEÑOR ku goso.”—Sal. 100:2.
[Study Questions]
1. Kiko por ta un fuente di gran goso pa sirbidónan di Yehova?
2. Kon e echo ku nos ta tene na mente ta ken a duna nos e tarea ta kontribuí na nos goso?
3. Kon orashon por yuda nos mantené nos goso den e sirbishi di Dios?
4. Kon un bon preparashon por yuda oumentá nos goso den e trabou di prediká, i kua ta algun manera práktiko ku nos por prepará?
5. Kon goso ta benefisiá nos i otro hende?