Oumentá Bo Goso den e Trabou di Prediká
1 Abo ta sinti e goso di kompartí e bon nobo ora bo ta den sirbishi? Si nos no tene kuidou, e mundu malbado rònt di nos lo por hasi nos tímido pa prediká, i asina pone nos pèrdè nos goso. Loke por deskurashá nos tambe ta ora nos ta prediká den un teritorio kaminda nos no ta haña bon reakshon. Ki pasonan práktiko nos por tuma pa oumentá nos goso den e trabou di prediká?
2 Sea Positivo: Un kos ku ta yuda sigur ta di mantené un aktitut positivo. Un manera pa hasi esei ta dor di meditá riba e gran privilegio ku nos tin di por ta “Dios su kolaboradónan.” (1 Kor. 3:9) Hesus tambe ta kompañá nos den e trabou aki. (Mat. 28:20) I e ta apoyá nos ku un ehérsito di angel. (Mat. 13:41, 49) Pues anto, nos por tin sigur ku Dios ta dirigí nos esfuersonan. (Rev. 14:6, 7) P’esei maske kon algun hende por reakshoná riba nos trabou, den shelu tin gran alegria!
3 Prepará Bon: Bon preparashon tambe ta oumentá nos goso. Prepará pa sirbishi no mester ta hopi trabou. Bo mester di solamente un par di minüt pa konsiderá un punto di kòmbersashon for di e revistanan aktual òf di e oferta di literatura di luna. Skohe un presentashon for di “Kiko Nos Por Bisa dje Revistanan,” den Nos Ministerio di Reino. Konsultá e suplemento di yanüari 2002, “Presentashonnan Sugerí pa Sirbishi di Fèlt,” òf buska un introdukshon efikas den e buki Rasonamentu. Si un opheshon ku doñonan di kas normalmente ta bini kuné ta stroba bo di sigui papia, prepará un kontesta ku ta tuma nota di nan komentario i ta dirigí atenshon na un tópiko ku ta lanta interes. E buki Rasonamentu por yuda bo hopi bon den esaki. Hasiendo uso di e yudansanan aki lo duna nos e konfiansa ku nos mester pa prediká ku goso.
4 Hasi Orashon Sinsero: Orashon ta esensial pa nos por tin goso duradero. Komo ku ta Yehova su trabou nos ta hasiendo, nos tin ku suplik’é pa nos haña su spiritu, di kua goso ta un di su frutanan. (Gal. 5:22) Yehova lo duna nos e fortalesa pa sigui prediká. (Fil. 4:13, NW) Hasi orashon tokante nos sirbishi por yuda nos keda ku e punto di bista korekto ora nos topa ku eksperensianan desagradabel. (Echo. 13:52; 1 Ped. 4:13, 14) Si nos ta sinti nos intimidá, orashon por yuda nos persistí ku kurashi i goso.—Echo. 4:31.
5 Krea Oportunidatnan: Klaro ku nos sirbishi ta mas gososo ora nos por topa hende i duna nan testimonio. Podisé nos por tin mas éksito si nos kambia e ora ku nos ta bai di kas pa kas, kisas bai parti atardi òf ora kuminsá bira anochi. Tambe bo ta topa hende ki ora ku bo ta kana riba kaya, bai hasi kómpras, kore den bùs òf ta keiru den parke. Dikon no prepará un introdukshon breve pa kuminsá un kòmbersashon i tuma e inisiativa pa aserká hende ku ta parse amigabel? Òf kisas bo ta traha òf ta bai un skol públiko kaminda bo ta kòmbersá tur dia ku otro hende. Lo bo por haña chèns pa duna testimonio dor di simplemente kuminsá papia di un tópiko bíbliko ku ta lanta interes. Nos ta haña bon sugerensia na e promé página di e suplemento di Nos Ministerio di Reino di yanüari 2002. Kualkier un di e kosnan aki ku nos hasi por yuda mashá pa oumentá nos goso den e predikashon.
6 Komo ku goso ta yuda nos perseverá, ta masha vital pa nos manten’é! Hasiendo esei nos lo kosechá un gran rekompensa ora ku e trabou aki, ku nunka mas lo ser ripití, yega na su fin. E perspektiva ei so, por oumentá nos goso di prediká.—Mat. 25:21.