Laga Nos “Bai al Caso!”
1 A yega di sosodé cu un doño di cas ta interumpí bo presentacion bon prepará bisando: “Kico bo kier? Bai al caso!” Kico nos por siña for di un experencia asina?
2 Hopi hende awe no tin pacenshi. Nan kier sa ken nos ta i pakico nos ta na nan porta. Ora nan haña sa cu e propósito di nos bishita ta pa papia di Bijbel, por ta nan no kier sa mas. Den bida di hopi hende, lesamentu di Bijbel i combersacion tocante tópiconan spiritual no ta cosnan importante. Con nos por convencé e doñonan di cas ei cu ta bon pa nan tuma un par di minuut pa papia di un tópico di Bijbel cu nos?
3 Loke Ta Duna Mihó Resultado: E clave ta pa mustra e doño di cas cu Bijbel ta duna solucionnan práctico pa e problemanan cu e por tin, i haci esei den ménos palabra posibel. E presentacionnan mas eficas tin un pregunta specífico, diseñá pa pone e doño di cas pensa, siguí pa un texto bíblico cu ta contestá e pregunta. Podisé lo bo disfrutá di purba algun dje siguiente sugerencianan. Nan ta diseñá pa yuda nos “bai al caso” lihé i na mésun tempu, lanta interes dje doño di cas.
4 Den teritorio cu hopi bes hende ta bisa cu nan no ta interesá, haci un pregunta cu ta enbolbé nan personalmente:
◼ “Awor cu nos ta bai drenta e siguiente milenio, bo ta sinti bo optimista of insigur? [Permití contesta.] Bijbel a pronosticá e sucesonan inkietante cu nos ta mira awe i tambe nan resultado.” Lesa 2 Timoteo 3:1, 2, 5 i Proverbionan 2:21, 22.
◼ “Riba e isla aki hende ta masha preocupá cu cuido di salú. Bo tabata sa cu Dios ta primintí cu lo e solucioná tur problema di salú permanentemente?” Lesa Revelacion 21:3, 4.
◼ “Kico bo ta pensa lo ta e beneficionan pa nos comunidad si tur hende cu ta biba aki aplicá principionan bíblico?” Lesa Mateo 22:37-39.
5 Ya cu nos comision ta pa predicá e bon nobo di Reino, ki ora cu ta posibel nos mester hala atencion na loke e Reino lo logra. Lo bo por bisa:
◼ “Bo tabata sa cu e buki mas bieu na mundu, Bijbel, a pronosticá cu lo tin un solo gobiernu pa henter mundu?” Lesa Daniel 2:44.
◼ “Con bo ta kere mundu lo tabata si ta Jesucristo tabata goberná e tera?” Lesa Salmo 72:7, 8.
6 Den teritorio cu hende ta religioso, lo bo por purba un dje introduccionnan aki:
◼ “Hopi hende ta ser discriminá debí na nan sexo, religion of color. Kico bo ta kere Dios ta pensa di tal prehuicio?” Lesa Echonan 10:34, 35.
◼ “Nos sa cu Jesucristo a haci hopi milager den su tempu. Si bo por a pidié haci un milager mas, kico lo bo a pidi?” Lesa Salmo 72:12-14, 16.
7 Si e doño di cas no kier habri porta, lo bo por cuminsá un combersacion dor di bisa:
◼ “Mayoria hende awe ta cansá di tende di problema. Nan kier tende di solucion. Sin duda esei ta cierto den bo caso. Pero unda nos por haña berdadero solucion pa nos problemanan?” Permití contesta. Lesa 2 Timoteo 3:16, 17.
8 Pakico No Purb’é? Hopi bes un pregunta simpel i al caso, ta tur loke nos mester pa lanta e interes di un doño di cas. Un señora cu anteriormente tabata contra, a invitá dos ruman muher drenta su cas despues cu un di nan a puntr’é: “Bo sa cua ta e Reino cu bo ta pidi p’e den e Oracion di Nos Tata?” E pregunta a intrigá e señora, i el a aceptá un studio di Bijbel. Awor e ta un sirbidó dedicá di Jehova!
9 Ora bo ta papia cu un doño di cas, laga loke bo ta bisa ta sincero. Papia di curason. Tin mas chens cu hende ta respondé faborabel ora nan ta convencí cu bo ta ègt interesá den nan.—Echo. 2:46, 47.
10 Predicá e bon nobo ta un desafio awe. Tin doño di cas cu ta desconfiá hende cu nan no conocé. Otronan ta hiba bidanan masha ocupá i tin masha tiki tempu pa otro cos. Tog, nos por tin sigur cu ainda tin hopi hende merecedor pa haña. (Mat. 10:11) Nos esfuersonan pa busca nan, probablemente lo tin mas éxito si nos tene nos presentacionnan breve i “bai al caso!”