Kon pa Prepará Presentashon di Revista
1 Kisas bo ta puntra: ‘Pakiko nos tin ku prepará presentashon di revista, siendo ku e presentashonnan ta sali den tur edishon di Nos Ministerio di Reino?’ Ounke hopi publikadó a haña ku e presentashonnan sugerí aki ta útil, tòg nos kada un tin ku prepará. Un presentashon ku ta efektivo den un teritorio kisas no ta práktiko den un otro. P’esei, nos no mester sinti nos obligá di presentá e revistanan eksaktamente ku e mesun palabranan ku tin den e presentashonnan sugerí. Asta ora nos disidí di usa un presentashon sugerí, ta mihó nos pone e ideanan den nos mes palabranan.
2 Skohe un Artíkulo: Despues ku bo a kaba di lesa e revista, skohe un artíkulo apropiá pa boso teritorio i ku abo a haña interesante. E konvikshon i entusiasmo ku bo ta demostrá ora di presentá e artíkulo lo por duna e doño di kas tambe e gana di les’é. Ounke kisas bo ta hala atenshon na un artíkulo ku ta atraé mayoria hende den e teritorio lokal, familiarisá bo mes bon tambe ku e otro artíkulonan den e revista. Esaki lo permití bo adaptá bo presentashon si bo haña un persona ku kisas ta mas interesá den un otro tópiko.
3 Hasi un Pregunta: Despues, prepará bo palabranan di introdukshon kuidadosamente, pasobra bo introdukshon ta importante. Podisé ta bon pa hasi e doño di kas un pregunta ku ta pon’é pensa i asina lanta su interes den e artíkulo ku bo a skohe pa presentá. Generalmente preguntanan di punto di bista ta mas efikas. Evitá di puntra algu ku lo pone e doño di kas sintié inkómodo òf ku e tin ku defendé su mes.
4 Lesa un Teksto di Beibel: Finalmente, skohe un teksto ku kisas bo a haña den e artíkulo ku bo ta bai presentá. Si e doño di kas su sirkunstansia ta permití, bo ta les’é p’e. Lesamentu di un teksto di Beibel lo yuda e doño di kas komprondé ku nos mensahe ta bini for di e Palabra di Dios. (1 Tes. 2:13) Ademas, e teksto lo ta un testimonio p’e, asta si e rechasá e revistanan. Tin publikadó ku a lesa un teksto di Beibel pa lanta interes di e doño di kas promé ku nan a hasié un pregunta spesífiko. Podisé bo por introdusí e teksto, bisando: “Mi tin gana di sa bo opinion riba loke e teksto di Beibel aki ta bisa.” Kaba hala e persona su atenshon na un punto relashoná ku e teksto ei den e revista i duna un komentario breve pa oumentá su interes, promé ku bo ofresé e revista.
5 No tin regla estrikto tokante kiko pa bisa ora di ofresé revista. Generalmente, ta mihó pa bo presentashon ta simpel i breve. Usa un introdukshon ku bo ta sinti bo mes kómodo kuné i ku ta duna bon resultado. Enfoká riba e balor superior di e revistanan, i sea entusiasmá. Si bo ta bon prepará, lo bo ta mas efikas den laga E Toren di Vigilansia i ¡Despertad! serka personanan ku tin “e disposishon korekto pa bida eterno.”—Echo. 13:48, NW.
[Study Questions]
1. Dikon ta mihó pa nos prepará nos mes presentashon di revista en bes di simplemente siña for kabes un di esnan sugerí den Nos Ministerio di Reino?
2. Kiko bo tin ku tene kuenta kuné ora bo ta skohe un artíkulo pa presentá?
3. Ku ki tipo di introdukshon bo ta haña mihó resultado?
4. Kiko ta e benefisionan di lesa un teksto di Beibel pa e doño di kas ora sirkunstansianan ta permití esei?
5. Kiko ta e puntonan básiko ku bo mester tene na mente ora di prepará un presentashon di revista?