Bo Ta Cumpliendo cu Bo Ministerio Cabalmente?
1 Den e buki di Echonan, nos ta lesa cu e disipelnan di Jesus a cumpli cu nan ministerio dor di duna “testimonio cabal” na e hendenan. (Echo. 2:40; 8:25; 28:23) I esei sigur tabata apostel Pablo su meta. (Echo. 20:24) Esei no ta bo meta tambe como un minister dje bon nobo? Con bo por logra esaki?
2 Prepará Bo Presentacion: Preparacion ta importante si bo kier ta sigur di duna un bon testimonio den e ministerio. Esaki ta asina foral ora di ofrecé revista, ya cu e tópico dje revistanan ta cambia constant. Pa nos ta mihó ekipá, e edicion aki di Nos Ministerio di Reino ta introducí un rasgo nobo: e columna na man robes, cu ta mencioná vários ehempel di maneranan pa presentá e revistanan actual di Toren di Vigilancia i Spierta! Di cada edicion dje revistanan, e columna lo resaltá un tema oportuno cu lo atraé atencion di hopi hende. Con lo bo por desaroyá e presentacionnan breve aki?
3 Scoge un sugerencia cu segun bo lo ta esun mas efectivo den bo teritorio. Lesa e artículo cu bo ta bai resaltá cu sumo atencion, i tuma nota di puntonan specífico cu probablemente lo stimulá interes. Busca un texto bíblico mencioná den e revista cu ta cuadra cu bo combersacion i cu lo bo por lesa pa e doño di cas. Agregá un conclusion breve pa animá bo oyente pa lesa e revista i, si ta apropiado, un declaracion breve cu ta laga e doño di cas sa cu e por haci un donacion p’e obra mundial di Testigonan di Jehova. Caba, train bo presentacion.
4 Planea pa Usa Bijbel: Cu bon planeamentu, bo por incluí hopi bes un texto bíblico den bo presentacion. Por ehempel, na hopi lugá publicadónan cu experencia tin éxito cu e método di yega na porta cu Bijbel den man, cumindá e doño di cas, i bisa:
◼ “Nos ta puntrando hende si nan ta kere esaki . . .” Lesa Génesis 1:1, caba puntra: “Bo ta eens cu e declaracion aki?” Si e persona ta eens, anto bisa: “Mi tambe ta eens. Sin embargo, bo ta kere cu si Dios a crea tur cos, anto e ta responsabel tambe pa maldad?” Despues di tende e persona su contesta, lesa Eclesiástes 7:29. Habri e buki Conocimentu na página 71, i lesa paragraf 2. Animá e persona pa lesa e buki. Si e doño di cas no ta eens cu e declaracion na Génesis 1:1, urgié pa examiná e buki Creacion.
5 Rebishitá Tur Persona Interesá: Bo no por cumpli cu bo ministerio plenamente si bo no ta rebishitá e personanan interesá cu bo topa. Despues di un bon combersacion, sin importá si bo a laga revista of otro literatura, haci un anotacion dje persona su nomber i adres. Purba diligentemente di cultivá e persona su interes dor di regresá unbes. I haci sigur di ofrecé un studio di Bijbel.
6 E disipelnan di promé siglo tabata sa cu Jesus a manda nan “duna un testimonio cabal.” (Echo. 10:42) E mésun mandamentu ei ta conta pa nos, pasobra esei ta e único manera cu nos lo por haci disipel. (Mat. 28:19, 20) Laga nos haci nos máximo esfuerso pa cumpli cu nos ministerio cabalmente.—2 Tim. 4:5.