Kon pa Usa Presentashonnan Sugerí
1 Regularmente nos ta haña den Nos Ministerio di Reino sugerensianan enkuanto kon pa ofresé nos revistanan i otro publikashonnan. Ora nos ta den sirbishi di vèlt, nos no tin nodi ripití e presentashonnan aki palabra pa palabra. A prepará nan pa duna nos un idea di loke nos lo por bisa. Por lo general nos lo ta mas efektivo si nos usa nos propio palabranan. Si nos ekspresá nos mes na un manera natural e doño di kas lo sintié kómodo i esei ta reflehá sinseridat i konvikshon di nos parti.—2 Kor. 2:17; 1 Tes. 1:5.
2 Adaptá Bo Presentashon: E manera ku nos ta presentá e bon nobo ta dependé hopi di kustumbernan lokal. Ta posibel pa bo interkambiá saludo ku e doño di kas i kaba hinka bo presentashon den e kòmbersashon, òf hende den bo teritorio ta spera pa bo bisa mesora ta kiko bo a bin hasi? Esei ta varia di un lugá pa otro i tin bes di persona pa persona. Ora di hasi pregunta tambe ta nesesario pa usa disernimentu. Preguntanan ku na algun kaminda ta apropiá, kisas na otro kaminda ta laga hende sinti nan mes inkómodo. Pues, nos mester usa sano huisio i adaptá nos presentashonnan na armonia ku loke ta aseptabel lokalmente.
3 Ademas, ora nos ta prepará pa sirbishi di vèlt, nos mester tene kuenta ku e background i manera di pensa di e hendenan den nos teritorio. Por ehèmpel, probablemente e manera ku lo bo papia tokante Mateo 6:9 i 10 ku un katóliko deboto lo ta diferente for di e manera ku lo bo papia ku un hende ku no konosé e orashon di “Nos Tata.” Dor di tuma poko tempu i pensa di antemano riba nos presentashonnan, hopi bes nos por adaptá nan i di e manera ei hasi nan mas interesante pa e hendenan ku nos ta topa den sirbishi di vèlt.—1 Kor. 9:20-23.
4 Asta si nos tin planiá pa usa un presentashon sugerí kasi ‘al pie de la letra,’ tòg nos tin ku hasi un bon preparashon. Nos mester lesa e kapítulo òf artíkulo ku nos tin pensá di presentá kuidadosamente i buska puntonan ku lo por lanta interes. Anto hinka nan den nos presentashon. Ta solamente si nos ta familiarisá ku e ekselente informashon den nos publikashonnan nos lo por ofresé nan ku entusiasmo.
5 Otro Introdukshonnan: Nos tin mag di usa solamente e presentashonnan sugerí? Nò. Si bo ta sinti bo mes mas kómodo ku un otro introdukshon òf un otro teksto, us’é. Spesialmente pa loke ta toka e revistanan, sea alerta pa oportunidatnan den kua lo bo por hala atenshon na artíkulonan sekundario ku lo por ta di interes spesial den bo teritorio. Ora ku mester hasi un demostrashon di presentashonnan pa sirbishi di vèlt den Reunion di Sirbishi, por hasi areglo pa tene demostrashon di kualke introdukshon ku ta duna bon resultado den e teritorio lokal. Esaki lo por yuda tur publikadó pa presentá e bon nobo di un manera efikas.
[Study Questions]
1. Kon nos mester mira e presentashonnan ku ta wòrdu sugerí?
2. Dikon nos mester tene kuenta ku kustumbernan lokal ora di prepará nos presentashonnan?
3. Pakiko nos tin ku tene kuenta ku e background i manera di pensa di e hendenan ku nos ta papia kuné?
4. Dikon bon preparashon ta esensial?
5. Den ki kaso nos lo por prepará un presentashon diferente, i kon nos por hasi esei?