Considerá e Nomber Bunita di Jehova Como di Hopi Balor
1 Ora Satanas a pone nos promé mayornan cometé picá, el a difamá e nomber di Dios. Diabel a insinuá cu Jehova a gaña Adam. (Gén. 3:1-5) Siendo cu e nomber divino ta conectá cu Dios su abilidad di cumpli cu su palabra, loke Satanas a bisa ei tabata e calumnia di mas grandi. Pero Jehova a limpia su nomber di reproche i a hacié bunita dor di cumpli progresivamente cu su propósito divino.—Isa. 63:12-14.
2 Nos ta e pueblo cu Jehova ‘a yama pa su nomber.’ (Echo. 15:14, 17) Esaki ta duna nos e chens di demostrá con nos ta sinti pa cu santificacion di su nomber. Como cu e nomber di Jehova ta representá tur loke ta bon, amabel, amoroso, misericordioso i hustu, pa nos e ta ègt bunita. Nos ta masha impresioná cu e grandesa di Dios su nomber glorioso. (Sal. 8:1; 99:3; 148:13) Kico tur esaki mester impulsá nos pa haci?
3 Santificá e Nomber di Dios: No por haci e nomber di Dios mas santu cu e ta caba. Pero mediante nos conducta limpi i e predicacion di Reino, nos por demostrá cu nos ta considerá e nomber di Dios di hopi balor. Laga nos sclama: “Duna danki na Jehova! Inbocá su nomber. Duna di conocé den pueblo su tratamentu. Haci mencion cu su nomber ta ser halsá.” (Isa. 12:4) Con nos por haci esaki?
4 Nos por probechá di tur oportunidad pa proclamá e nomber di Jehova i tur loke e ta representá. Sea cu e ta formal of informalmente, di cas pa cas of di negoshi pa negoshi, riba caya of via telefon, nos actividad di predicá ta onra Jehova. Ora nos haña hende interesá cu scucha, nos mester traha afsprak definitivo pa pasa bek i siña nan mas tocante Jehova. Esaki ta nificá cu nos mester cumpli cu e afspraknan ei sin falta i perseverá den nos intentonan pa cuminsá studio di Bijbel. Felismente, tur aña cientos di miles di hende ta siña conocé, respetá i santificá e nomber bunita di Jehova.
5 Ora nos duna tur loke nos por den e trabou di santificá e nomber di Dios, nos ta demostrá bon cla unda nos ta pará den e cuestion cu Satanas a lanta den Eden. E trabou aki ta esun mas noble i onorabel cu nos por efectuá. Laga nos considerá Jehova su bunita nomber di hopi balor, i alab’é celosamente!—1 Cró. 29:13.