Imitá Jehova Su Imparcialidad
1 Jehova ta interesá den hende. E ta aceptá imparcialmente tur cu ta haci su boluntad. (Echo. 10:34, 35) Jesus tambe tabata imparcial ora el a predicá na hende. (Luc. 20:21) Nos tin cu imitá nan ehempel, mescos cu Pablo a haci. El a skirbi: “Tin e mésun Señor riba tur, kende ta ricu pa cu tur esnan cu ta inbok’é.”—Rom. 10:12.
2 Proclamá e bon nobo dje Reino di Dios na tur hende cu nos topa ta trece gloria na Dios. Nos tin cu sigui compartí e mensahe maraviyoso aki cu otro hende, sin importá nan rasa, posicion social, educacion of posicion financiero. (Rom. 10:11-13) Esaki ta nificá predicá na tur esnan cu kier scucha: homber, muher, hóben i bieu. Nos tin cu yama na tur porta pa duna cada doño di cas un oportunidad pa tende e berdad.
3 Mustra Interes den Tur Hende: Nos meta ta pa haña contacto cu tur hende cu ta posibel. Cu esaki na mente, algun publicadó tabatin éxito den duna testimonio na hende na oficina di dokter, na hospital, cas di cuido, oficina di asuntunan social i centronan di rehabilitacion. Ademas, publicadónan a duna testimonio na directornan di casnan funerario, supervisor i conseheronan di scol i huesnan. Ora di abordá funcionarionan, ta na su lugá pa expresá aprecio na nan pa e servicionan útil cu nan ta percurá pa comunidad. Sea respetuoso, i scoge artículonan oportuno cu ta trata foral cu nan tipo di trabou i e problemanan asociá cuné.
4 Den un caso, un ruman muher a logra papia cu un hues den su oficina. Despues di un combersacion animá, e hues di su mes a duna e comentario aki: “Bo sa kico mi gusta di Testigonan di Jehova? Nan tin principionan bon fundá for di cua nan no ta desviá.” E ruman a duna un bon testimonio na e persona influyente aki.
5 Nos no por lesa curason di hende. Sin embargo, dor di papia cu tur hende cu nos topa, nos ta mustra nos fe den Dios su abilidad di dirigí nos trabou. Ademas, esaki ta duna hende e privilegio di tende i reaccioná riba e mensahe di speransa. (1 Tim. 2:3, 4) Laga nos usa nos tempu sabí i haci esfuerso pa imitá Jehova su imparcialidad dor di alcansá tur hende cu nos por cu e bon nobo.—Rom. 2:11; Efe. 5:1, 2.