Kico Por Yuda Nos Para Firme den e Fe?
1 For di tempu cu nos a cuminsá asociá cu Jehova su organisacion, nos progreso spiritual a resultá di ta un fuente di goso pa nos! Sin embargo, pa keda ‘cu rais, edificá i stabilisá den e fe,’ crecementu spiritual continuo ta necesario. (Col. 2:6, 7) Aunke mayoria ruman a prosperá spiritualmente, tin cu a drif bai dor cu nan no a keda “para firme den e fe.” (1 Cor. 16:13) Nos por evitá cu esaki ta sosodé cu nos. Con?
2 Actividad Spiritual Constante: Establecé un bon rutina spiritual den Jehova su organisacion. Ei nos necesidadnan spiritual ta ser atendé abundantemente. Reunionnan di congregacion, asamblea i congresonan ta stimulá nos na mayor crecementu i stabilidad spiritual, basta nos ta constantemente presente pa cosechá e beneficionan. (Heb. 10:24, 25) Un rutina regular di lesa Bijbel, e revistanan Toren di Vigilancia i Spierta! i e bukinan cu ta trata e cuminda sólido dje Palabra di Dios, lo pone nos raisnan spiritual crece bai hundu i bira fuerte. (Heb. 5:14) Fiha metanan spiritual personal i traha diligentemente pa alcansá nan, tambe lo trece beneficionan duradero.—Fil. 3:16.
3 Yudansa for di Rumannan Maduro: Trata na expandé bo asociacion pa incluí esnan spiritualmente maduro den congregacion. Siña conocé e ancianonan, ya cu nan ta esnan cu principalmente por fortalecé nos. (1 Tes. 2:11, 12) Ricibí cu gustu cualkier conseho of sugerencia cu nan tin di ofrecé. (Efe. 4:11-16) Sirbidónan ministerial tambe ta interesá pa yuda otronan bira firme den fe, pues acudí n’e rumannan aki pa animacion.
4 Bo tin mester di yudansa den e ministerio? Papia cu e ancianonan i pidi yudansa. Kisas nan por incluí bo den e programa Pioneronan Ta Yuda Otro Publicadónan. Bo ta recien bautisá? Studia e buki Nos Ministerio i aplicá loke e ta contené lo stimulá bo progreso den direccion di madures spiritual. Bo ta un mayor? Fortalecé e spiritualidad di bo yunan continuamente.—Efe. 6:4.
5 Dor di saca rais i bira stabilisá den e fe, nos ta disfrutá di un relacion íntimo cu Jehova i di asociacion caluroso cu nos rumannan. Esaki ta capacitá nos pa resistí e atakenan di Satanas, i ta fortalecé nos speransa di un futuro eterno.—1 Ped. 5:9, 10.