Un Yudansa Fásil pa Haña
1 Anna, un ruman muhé kende tin un kasá inkrédulo i un trabou ku ta tuma hopi di su tempu, tabatin un lucha pa asistí na reunionnan kristian riba un base regular, partisipá den e ministerio i studia e Palabra di Dios. Ounke ainda e tabata stima Yehova, el a bira inaktivo. Afortunadamente, el a risibí yudansa spiritual di ansianonan ku a mustra interes den dje.
2 Ora nos ta aseptá yudansa spiritual ku ta bini mediante e kongregashon kristian, nos ta demostrá ku nos ta dependé riba Yehova. Imitando Hesukristu su interes amoroso, ansianonan den e kongregashon ta buska oportunidat pa duna animashon i yudansa práktiko na rumannan ku tin difikultat pa kumpli ku nan aktividatnan spiritual. (1 Tes. 5:14) Hopi bes, un palabra bondadoso di animashon basá riba un pasashi bíbliko alentador por ta nèt loke e persona tin mester. Sin embargo, no ta e ansianonan so tin e responsabilidat di tuma inisiativa pa yuda esnan ku temporalmente ta débil; mas bien e ta un responsabilidat di tur kristian. Ta sigur ku nos kada un a yega di eksperensiá e poder di un bon “palabra papiá na ora apropiá.”—Pro. 25:11; Isa. 35:3, 4.
3 Tuma Inisiativa: Pa nos por mustra amor i interes den nos rumannan ku tin mester di yudansa, nos tin ku tuma inisiativa, mustra kompashon i ser sinsero. Ora Jonatan a haña sa di David su situashon difísil, el “a lanta i a bai serka David na Hores, i a enkurash’é.” (1 Sam. 23:15, 16) Yuda otro hende na un manera bondadoso. Palabranan motivá pa berdadero interes ta duna mihó resultado. Ademas, Hesus a mustra bon kla den su ilustrashon ku pa nos gana nos ruman spiritual nos mester hasi esfuerso diligente i desididu. (Luk. 15:4) Si nos tin un deseo sinsero pa yuda un otro persona, esaki lo motivá nos pa perseverá den duna yudansa ounke nos no ta mira progreso mesora.
4 Ora nos ta tuma inisiativa pa invitá otro publikadó, manera esnan di nos estudio di buki, pa kompañá nos den sirbishi, esaki ta sirbi komo un gran animashon! Segun ku nos ta yuda un ko-sirbidó di Yehova partisipá den e ministerio, nos por usa e oportunidat ei pa enkurash’é. E ratunan plasentero ku nos ta pasa huntu den sirbishi di Yehova ta un estímulo foral pa esnan ku ta rekobrando nan balansa spiritual.
5 Un Areglo Amoroso: Rumannan ku tin algun tempu sin prediká òf asosiá ku e kongregashon kisas tin mester di mas yudansa pa fortalesé nan fe. Un estudio di Beibel ku nan den un publikashon manera Adorá e Úniko Dios Berdadero, Hala Serka Yehova, òf Kiko Beibel Ta Siñá Realmente? kisas ta nèt loke nan tin mester. Dor ku e persona ta batisá kaba, por lo general no tin nodi studia kuné pa un periodo largu. E Komité di Sirbishi di Kongregashon mester ta atento pa ripará ken lo por benefisiá di e areglo aki.—Wak Kaha di Pregunta den Nos Ministerio di Reino di novèmber 1998 i novèmber 2000.
6 Anna, menshoná anteriormente, a aseptá ku apresio e sugerensia di ansianonan pa un ruman muhé spiritualmente maduro studia Beibel kuné. E tabatin mester di solamente kuater seshon di estudio pa yud’é hala serka Yehova atrobe. El a bolbe kuminsá asistí na reunionnan di kongregashon i tabatin deseo atrobe pa alabá Yehova Dios públikamente. E ruman muhé maduro a yud’é den sirbishi tambe dor di bai estudio di Beibel kuné te ora ku e tabata sufisiente fuerte pa bai prediká di kas pa kas. Un man bondadoso ta tur loke e tabatin mester pa kuminsá atrobe!
7 Dor di fortalesé rumannan ku ta den nesesidat, nos tur ta ser bendishoná. Esun ku ta risibí yudansa ta disfrutá di e felisidat di hala serka Yehova i di partisipá den e aktividatnan di Su organisashon. Ansianonan ta keda kontentu di mira e progreso spiritual ei. (Luk. 15:5, 6) Ora tur hende ta mustra interes amoroso den otro, e kongregashon ta bira mas uní. (Kol. 3:12-14) Pues, nos tin tur motibu pa imitá Yehova, un yudansa fásil pa haña!—Efe. 5:1.
[Study Questions]
1. Kon un persona por bira suak spiritualmente?
2. Den ki manera tur kristian por ta un yudansa fásil pa haña?
3, 4. Kiko yuda otro rumannan ta enserá, i kon nos por hasi esei?
5. Ki yudansa ansianonan por ofresé den sierto sirkunstansia?
6. Kiko a yuda un ruman muhé bolbe bira fuerte spiritualmente?
7. Kiko ta e benefisionan di fortalesé rumannan den sentido spiritual?