Caha Di Pregunta

◼ Con por yuda un persona cu tabata inactivo pa hopi tempu, cualificá atrobe como publicadó dje bon nobo?

Ora un persona inactivo duna evidencia cu e tin deseo sincero di sirbi Jehova, esaki ta motibu pa alegrá. (Luc. 15:4-6) Probablemente, e persona a laga oposicion of preshon di bida tuma tur su tempu di studio personal, asistencia na reunion i participacion den e ministerio di veld. Con ta e mihó manera pa duna yudansa personal di manera cu lo e haci progreso spiritual?

Nos tur tin cu tuma e iniciativa pa sigurá e persona aki di nos amor cristian p’e. E ancianonan lo ta cla pa evaluá ki necesidadnan spiritual specífico e tin. (Sant. 5:14, 15) Si e persona tabata inactivo pa un tempu corticu, kisas tur loke mester pa reactiv’é den sirbishi di veld ta pa un publicadó experenciá dun’é un man. Sin embargo, si pa hopi tempu e persona inactivo no a asociá cu e congregacion, probablemente mas yudansa lo ta necesario. Pa edificá fe i aprecio, kisas ta consehabel conducí un studio bíblico personal cuné den un publicacion apropiado. Den tal caso, e superintendente di sirbishi lo haci areglo pa un publicadó cualificá conducí e studio. (Heb. 5:12-14; wak e Caha di Pregunta den Nos Ministerio di Reino di november 1998.) Si bo sa di un persona cu mester di tal yudansa, papia cu e superintendente di sirbishi den bo congregacion.

Promé cu invitá un persona inactivo pa hopi tempu pa bolbe participá den e ministerio, ta consehabel pa dos anciano reuní cuné pa wak si e ta cualificá como publicadó di Reino. Nan lo sigui un procedura parecido na esun cu ta usa ora di reuní cu esnan nobo cu kier cualificá como publicadó dje bon nobo. (Wak E Toren di Vigilancia [na spañó] di 15 di november 1988, página 17.) E persona inactivo mester tin un deseo sincero di compartí e bon nobo cu otronan. Tambe e mester ta cumpliendo cu e rekisitonan básico describí na página 98-9 dje buki Nos Ministerio, i ta asistiendo regularmente na reunionnan di congregacion.

Tene un bon rutina spiritual lo contribuí hopi na yuda e persona cu ta biniendo bek pa fortalecé i mantené su relacion precioso cu Jehova i sigui cana den e caminda cu ta hiba na bida eterno. (Mat. 7:14; Heb. 10:23-25) Haciendo “tur esfuerso sincero” i desaroyando cualidadnan cristian duradero lo prevení cu un dia lo e bolbe bira un disipel cristian “inactivo of infructífero.”—2 Ped. 1:5-8.