Yuda Nan Bira Activo Atrobe
1 Reconociendo un potencial peliger spiritual pa su compañeronan cristian, apostel Pablo a skirbi: “Ta e ora caba pa boso lanta for di soño, pasobra awor nos salbacion ta mas cerca cu tempu nos a bira creyente.” (Rom. 13:11) Pablo tabata preocupá pa su rumannan cu a bira spiritualmente zonzá; e tabata ansioso pa rebibá nan na actividad renobá.
2 Di berdad por bisa cu e anochi dje mundu bieu aki ta hopi avansá i cu e manisé dje mundu nobo ta djis nos dilanti. (Rom. 13:12) Nos tin bon motibu pa ta preocupá pa nos rumannan cu a stop di asociá cu nos como predicadornan dje bon nobo. Aña pasá, na Merca so, mas cu 27.000 publicador a ser reactivá (na islanan ABC, 42 publicador). Con nos por yuda otro publicadornan inactivo pa sirbi Jehova atrobe?
3 Loke Ancianonan Por Haci: Mayoria di esnan cu ta inactivo no a bandoná e berdad; nan simplemente a stop di predicá debí na desanimacion, problemanan personal, materialismo, of otro ansiedadnan di bida. (Luc. 21:34-36) Si ta posibel, ta hopi mas mihó pa yuda nan promé cu nan bira inactivo. E secretario di congregacion mester alertá e conductor di Studio di Buki ora un publicador bira iregular den raportá actividad di sirbishi. Por haci areglo pa un bishita di pastoreo. Nan mester purba determiná e causa fundamental dje problema i con por duna yudansa.—Mira Toren di Vigilancia di 15 di september, 1993, página 20-3.
4 Con Otronan Por Yuda: Mayoria di nos conocé un persona cu a bira inactivo. E por ta un persona cu tabata ántes un amigu íntimo. Kico nos por haci pa yuda? Pakico no pasa pa un bishita corticu. Bis’é cu bo ta sinti falta di su compania. Sea alegre i positivo. Expresá bo preocupacion sin implicá cu e ta spiritualmente malu. Conta experencianan edificante of otro cosnan bon cu e congregacion ta logrando. Entusiásticamente cont’é tocante e Congreso di Districto “Mensaheronan di Pas Divino,” i anim’é pa asistí. Asociando atrobe cu e congregacion lo por yud’é mas cu cualkier otro cos. Ofrecé pa compañ’é n’e reunionnan. Laga e ancianonan sa dje reaccion cu bo a ricibí.
5 Ora un persona cu a bira inactivo bolbe cuminsá asistí n’e reunionnan, probablemente lo e sinti su mes incómodo ora e topa otronan cu e tabata conocé ántes. No puntra e persona inactivo, “Unda bo tabata?” Mas bien, lagu’e sinti su mes bon biní. Enbolb’é den combersacion. Introducié na esnan cu e no conocé. Sinta banda di dje durante e reunion, haciendo sigur cu e tin un buki di cantica i e material cu ta ser studiá. Anim’é pa bini bek, i ofrecé bo yudansa si esei ta necesario.
6 Teniendo cariño caluroso pa esnan cu a dual, Jehova i Jesus ta alegrá ora personanan asina haci un recuperacion spiritual. (Mal. 3:7; Mat. 18:12-14) Nos por experenciá e mésun goso ei si nos logra yuda otronan sirbi Jehova atrobe.