No Lubidá Esnan Inaktivo
1 Bo konosé kualke persona ku a bira inaktivo? Kisas el a stòp di asosiá ku e kongregashon i a drif bai. Òf podisé bo a topa ku un persona asina ora bo tabata traha di kas pa kas den sirbishi. Nos tin ku keda tene na mente ku ainda e persona aki ta nos ruman spiritual. Nos mester konfirmá nos amor p’e i yud’é bolbe na e kongregashon i ‘serka e wardadó i kuidadó di nos alma.’—1 Ped. 2:25.
2 Demostrá Interes: Un yamada di telefòn òf bishita breve lo por sigurá un persona ku a bira inaktivo ku nos no a lubid’é. Kiko nos lo por bis’é? Podisé nos por animá e persona dor di simplemente bis’é ku nos ta kòrda riba dje. Mantené e kòmbersashon positivo i edifikante. (Fil. 4:8) Nos por menshoná un punto ku nos a gusta durante un reunion resien. Ademas, nos por invit’é na un binidero reunion òf asamblea i ofresé pa warda un lugá p’e òf yud’é ku transpòrt.
3 Un ruman muhé tabata inaktivo pa mas ku 20 aña ora ku un otro ruman a top’é den teritorio. Ounke e no kier a aseptá un estudio di Beibel, e ruman muhé ku a top’é a bolbe bishit’é i a laga e revistanan nobo serka dje. Despues di e kongreso di distrito, e publikadó a kompartí algun punto sobresaliente di e kongreso ku e ruman inaktivo, i ku tempu el a bira aktivo atrobe.
4 Ora un Persona Bolbe: Kon nos mester trata un ruman ku bolbe kuminsá bini e reunionnan? Wèl, kon Hesus a trata su disipelnan despues ku nan a bandon’é temporalmente? Ku kariño el a referí na nan komo su “rumannan” i a mustra ku e tin konfiansa den nan. Asta el a duna nan un asignashon importante. (Mat. 28:10, 18, 19) Djis despues nan tabata okupá deklarando e bon nobo “sin stòp.”—Echo. 5:42, NW.
5 Promé ku nos ofresé un estudio di Beibel na un persona ku a bira inaktivo òf promé ku nos invitá un ruman ku ta inaktivo pa hopi tempu kaba pa bai ku nos den sirbishi, nos mester buska guia serka e ansianonan. Si nos topa un publikadó inaktivo den teritorio, nos mester informá e ansianonan pa asina nan por duna e yudansa nesesario.
6 Manera Beibel ta mustra bon kla, ta solamente esnan ku kore e kareda te na final lo risibí salbashon. (Mat. 24:13) P’esei, presta atenshon na esnan ku podisé a trompeká òf a drif bai. Si nos tin pasenshi i ta reflehá e amor di Yehova dor di mustra interes sinsero den e personanan ei, nos lo por eksperensiá e goso di mira nan reanudá nan sirbishi sagrado huntu ku nos.—Luk. 15:4-10.
[Study Questions]
1. Dikon nos tin ku tuma inisiativa pa animá esnan ku a bira inaktivo?
2. Kon nos por animá un persona inaktivo?
3. Kiko a yuda un ruman muhé bira aktivo atrobe?
4. Kon nos mester trata un persona ku bolbe kuminsá asosiá ku e kongregashon dor di asistí na e reunionnan?
5. Menshoná situashonnan den kua nos tin ku papia ku ansianonan tokante un persona inaktivo.
6. Ki goso nos por eksperensiá ora nos ta yuda esnan ku ta inaktivo?