Nos Ta Predicá Bon Nobo
1 Ki un privilegio maraviyoso nos tin di ta cargadó di “bon nobo di bon cosnan!” (Rom. 10:15) Nos tin un mensahe refrescante pa compartí cu hende cu ta rondoná di agitacion i desesperacion. Con nos por yuda nan reconocé cu nos ta ofrecé “bon nobo di algu mihó”?—Isa. 52:7.
2 Prepará un Mensahe Positivo: Nos combersacionnan den e ministerio lo tin un efecto saludabel si nos enfocá riba cosnan edificante. P’esei, ora nos ta prepará nos presentacion i repasá e publicacion cu nos lo ofrecé, nos tin cu resaltá e aspectonan positivo dje mensahe. Dor di compartí nos speransa basá riba Bijbel cu confiansa i entusiasmo, nos por verwagt resultadonan animador.—Pro. 25:11.
3 Aunke nos ta mustra comprension ora hende ta conta nos con nan ta ser afectá pa e condicionnan mundial cu ta empeorá, nos tin cu señalá na e berdadero solucion pa e problemanan di hende: e Reino di Dios. Asta ora nos ta papia dje binidero “dia di vengansa” di Jehova, nos kier mustra di ki manera esaki eigenlijk ta nificá “bon nobo na mansunan.” (Isa. 61:1, 2) Nos por trankilisá nos oyentenan cu tur loke Jehova haci, al final lo trece e mayor felicidad i e mihó resultado posibel.
4 Presentá e Berdad cu Berdadero Goso: Hende ta scucha mas lihé ora nan nota cu nos tin cara contentu i un tono di bos cu ta reflehá confiansa. Si nos ta reflehá un actitud optimista, nos oyentenan lo ripará cu nos ta “alegrá den e speransa.” (Rom. 12:12) P’esei kisas nan lo ta mas incliná na reaccioná faborabel n’e bon nobo. Ta sigur anto cu nos tin bon motibu pa semper desplegá un actitud positivo i gososo den tur aspecto di nos ministerio.
5 Como ministernan dje bon nobo, nos ta haci hopi mas cu djis informá. Nos predicacion ta compartí un speransa sigur di un mihó bida awor i tambe den futuro. (1 Tim. 4:8) Segun nos ta abordá cada persona, nos estado di ánimo positivo lo keda reflehá den loke nos ta bisa, i lo yuda hende aceptá e bon nobo. Laga nos incitá hende di curason sincero pa aceptá e bon nobo excitante cu nos ta predicá dor cu nos ta presta atencion na loke nos ta bisa i con nos ta bis’é!