Imitá Nos “Dios Felis,” Yehova
1 Yehova ta deseá realmente pa hende ta felis. Su Palabra ta krea den nos un anhelo pa mira e bendishonnan maravioso ku e tin wardá pa humanidat. (Isa. 65:21-25) Otro hende mester por mira ku nos ta haña goso ora nos ta kompartí “e glorioso bon nobo dje Dios felis” ku nan. (1 Tim. 1:11, NW) E manera ku nos ta papia tokante e mensahe di Reino mester reflehá nos amor p’e bèrdat i nos interes sinsero den e personanan ku nos ta papia kuné.—Rom. 1:14-16.
2 Ta sierto sí ku tin bes ta difísil pa mantené un aktitut gososo. Den algun teritorio nos ta haña masha poko hende ku ta reakshoná faborablemente na e mensahe di Reino. Tin bes nos mes tin ku trata ku situashonnan difísil den nos bida. Pa nos por mantené un aktitut gososo, ta bon pa nos kòrda ku e hendenan den teritorio tin un nesesidat urgente di tende i komprondé e bon nobo di Reino ku nos ta prediká. (Rom. 10:13, 14, 17) Ora nos meditá riba esaki, lo e yuda nos sigui padilanti ku goso den nos trabou di duna di konosé kiko ta Yehova su provishonnan miserikòrdioso pa salbashon.
3 Enfoká Riba Kosnan Positivo: Nos mester presta atenshon tambe na loke nos ta bisa. Ounke nos por menshoná un problema òf notisia ku hende tin na mente pa kuminsá un kòmbersashon, nos tin ku evitá di keda papia innesesariamente riba kosnan negativo. Nos tarea ta pa trese “bon nobo di felisidat.” (Isa. 52:7; Rom. 10:15) E bon nobo aki ta un mensahe basá riba Dios su promesanan di un futuro mas briante. (2 Ped. 3:13) Ku esaki na mente, usa e Skritura pa “kura hende di kurason kibrá.” (Isa. 61:1, 2) Esaki lo yuda kada un di nos mantené un aktitut gososo i positivo.
4 Sin duda, hende lo ripará nos goso ora nos ta partisipá den e trabou di prediká. P’esei anto, laga nos semper reflehá e disposishon di nos “Dios felis,” Yehova, segun ku nos ta kompartí e bon nobo di Reino ku hende den nos teritorio.