Bo Ta Respondé na Cristo Su Amor?
1 Refleccionando riba e curso di bida di su Doño, apostel Juan a skirbi: “Jesus, ya cu el a stima esnan di dje cu tabata den mundu, a stima nan te na fin.” (Juan 13:1) Durante e temporada aki di Memorial, nos pensamentunan ta bai riba e mayor expresion di Cristo su amor. Nos por respondé na e amor ei dor di ehercé fe den e rescate, dor di tin un participacion celoso den e trabou di predicá i, mescos cu Jesus, dor di wanta “te na fin.”—Mat. 24:13; 28:19, 20; Juan 3:16.
2 Respondiendo na Cristo Su Amor: Jesus tabata masha activo durante e último siman di su bida terenal. (Mat. 21:23; 23:1; 24:3) Como imitadónan di Cristo, amor ta motivá nos tambe pa “haci esfuerso vigoroso” den e sirbishi di Jehova. (Luc. 13:24) Lo bo por beneficiá dje areglonan pa mas actividad di predicá durante april dor di aumentá e tempu cu bo ta dedicá n’e ministerio?
3 E aña aki e Cena di Señor ta cai riba diarason anochi, 19 di april. Cuantu hende lo t’ei presente pa e ocasion importante aki? Pa un gran parti, esei ta dependé di nos. Bo a traha un lista di esnan cu bo tin pensá di invitá: bo studiantenan di Bijbel i otro personanan interesá, famianan, conocínan di negoshi i compañeronan di scol? Bo a tuma contacto cu nan caba i a extendé un invitacion caluroso na nan? Lo bo recordá nan dje fecha un par di dia promé cu Memorial? Nan tin mester di bo yudansa pa bini? E ancianonan tambe ta invitando esnan cu a bira inactivo den e ministerio. E echo cu Memorial lo ta riba un anochi den siman, en bes di den fin di siman, no ta hacié ménos importante pa tur hende asistí.
4 Bini Prepará: Ta importante pa nos ta prepará i pa nos tin e actitud mental corecto ora nos ta asistí na Memorial. Pablo a exhortá compañeronan creyente pa tene na mente e seriedad dje ocasion. (1 Cor. 11:20-26) Kisas bo por lesa capítulo 13 pa 17 dje Evangelio di Juan durante boso studio bíblico di famia, anto laga cada miembro di famia conta kico e sacrificio di Jesus ta nificá p’e. No lubidá di haci tambe e lesamentu diario di Bijbel pa e siman di Memorial!
5 Nos amor pa Cristo ta profundo, i e ta bai hopi mas leu cu 19 di april. Nos ta decididu pa demostrá nos amor p’e pa semper! E celebracion di Memorial dje aña aki lo yuda nos fortalecé e decision ei.