Laga Nos Ta Seloso pa Loke Ta Bon
1 Segun ku nos ta drenta e temporada di Memorial 2003, nos tin motibu na abundansia pa ta ‘seloso pa loke ta bon.’ (1 Ped. 3:13) E motibu prinsipal ta e sakrifisio di reskate di Hesukristu. (Mat. 20:28; Huan 3:16) Tokante esaki, apòstel Pedro a skirbi: “Boso no a wòrdu redimí ku kosnan ku ta peresé, manera plata òf oro, for di boso manera bano di biba . . . ma ku sanger presioso, komo di un lamchi sin defekto i sin mancha, e sanger di Kristu.” (1 Ped. 1:18, 19) Gratitut pa e ekspreshon ekstraordinario di amor aki ta impulsá nos pa keda okupá den hasi loke ta bon, rekonosiendo ku Hesus “a duna su mes pa nos, pa e por redimí nos di tur inikidat i purifiká pa su mes un pueblo pekuliar, ku selo den hasimentu di bon obra.”—Tito 2:14; 2 Kor. 5:14, 15.
2 Ora nos hasi loke ta agradabel den Dios su bista, nos ta disfrutá di un bon relashon kuné i ta kai bou di su kuido amoroso. (1 Ped. 3:10-12) Den e tempunan insigur aki, ta ki un bendishon pa sa ku Yehova ta perkurá pa nos i ta kla pa aktua na nos fabor, pa protehá nos “manera su pret’i wowo.”—Deu. 32:10; 2 Kró. 16:9.
3 Apesar ku nan a enfrentá prueba, e promé kristiannan, kende Pedro a skirbi, tabata yen di selo i entusiasmo, i nan tabata proklamá e bon nobo mas leu posibel. (1 Ped. 1:6; 4:12) Esei ta sierto den kaso di e pueblo di Dios awe tambe. Maske nos ta biba den “tempunan trabahoso,” apresio pa Yehova su bondat ta motivá nos pa hasi Dios su boluntat ku selo. (2 Tim. 3:1; Sal. 145:7) Laga nos konsiderá algun bon obra ku nos lo okupá nos mes kuné durante e temporada aki di Memorial.
4 Invitá Otro Hende pa Bin Memorial: Un manera ku nos por mustra nos apresio pa e regalo ekstraordinario di e reskate ta dor di ta presente na e konmemorashon anual di Hesus su morto, ku e aña aki lo kai riba djarason, 16 di aprel, despues ku solo baha. (Luk. 22:19, 20) Aña pasá nos a haña informe di 94.600 kongregashon rònt mundu i tabatin un asistensia total di 15.597.746 hende! Kompará ku e aña anterior esei ta un oumentu di mas ku 220.000 hende.
5 Kuantu hende lo asistí e aña aki? Pa un gran parti esei ta dependé di nos esfuerso diligente pa animá otro hende pa reuní ku nos. Kuminsá na traha un lista di tur e hendenan ku lo bo tin gana di invitá. E promé personanan riba e lista mester ta bo famianan yegá. Si bo tin un kasá inkrédulo, mustr’é sinseramente ku bo tin mashá gana p’e kompañá bo. Un esposo inkrédulo a bisa ku el a asistí na Memorial aña pasá dor ku el a mira kuantu su presensia tabata nifiká pa su esposa. E siguiente hendenan riba bo lista por ta otro miembronan di famia, bisiña, koleganan di trabou òf kompañeronan di skol. Hasi sigur di invitá bo studiantenan di Beibel.
6 Ora bo kaba di traha bo lista, apartá tempu pa duna un invitashon personal na kada un di nan. Usa e papelnan di invitashon di Memorial pa hasi esei. Pa yuda hende kòrdá ki ora i na unda lo tene Memorial, taip òf skirbi ku blòklèter e ora i e lugá mas abou riba e papel di invitashon. Segun ku 16 di aprel ta aserká, pasa duna esnan ku ta riba bo lista un rekordatorio, sea personalmente òf via telefon. Laga nos yuda mas tantu hende posibel pa ta presente na e okashon di mas sagrado aki.
7 Yuda Esnan Ku Asistí na Memorial: E anochi di Memorial semper ta un okashon emoshonante. Nos tin e oportunidat pa duna un bonbiní na hende ku normalmente no ta asistí na nos reunionnan. Plania pa bo yega trempan i keda un bon ratu despues di e reunion, si sirkunstansia lokal ta permití esei. Tuma inisiativa pa sera konosí ku esnan nobo ku asistí. Sea kariñoso i hospitalario!—Rom. 12:13.
8 Algun hende ku asistí na Memorial por wòrdu yudá pa hasi mas progreso spiritual mediante un studio di Beibel? Hasi esfuerso pa haña nòmber i adrès di tur bishitante ku aktualmente no ta haña bishita pa asina bo por sigui yud’é. Ku yudansa amoroso, algun di nan lo por progresá te na e punto di kualifiká pa bira publikadónan ku no ta batisá, promé ku e siguiente Memorial. Ora di rebishitá esnan ku a asistí na Memorial, invitá nan pa e diskurso spesial ku lo ser duná dia 27 di aprel.
9 Bo Por Traha Pionero Ousiliar Durante e Temporada di Memorial Aki? Tur aña nos selo pa Yehova ta konmové nos pa hasi nos máksimo esfuerso den sirbishi durante e lunanan spesial di aktividat teokrátiko. Esfuerso uní di un kongregashon kompletu pa prediká e bon nobo ku selo durante e temporada di Memorial por duna bon resultado.
10 Kon ansianonan por lanta entusiasmo pa e trabou di pionero ousiliar di e aña aki? Nan por kuminsá for di trempan, animando mas tantu ruman posibel pa yena e solisitut pa traha pionero. Por tene reunion pa sirbishi di vèlt na diferente ora durante dia pa tur esnan den e kongregashon por haña oportunidat pa sali den sirbishi. Ku bon planiamentu, bo kongregashon por disfrutá di hopi bendishon ku e trabou di pionero ousiliar ta trese kuné.
11 Purba Logra un Partisipashon di 100 Porshentu den Sirbishi: Nos amor pa Dios i pa nos próhimo ta motivá nos tur luna pa hasi bon uso di nos tempu pa kompartí e bon nobo ku otro hende. (Mat. 22:37-39) E superintendentenan di Studio di Buki di Kongregashon i nan asistentenan tin ku hasi esfuerso pa yuda esnan den nan grupo pa partisipá tur luna den sirbishi. Un bon manera pa hasi esaki ta dor di hasi afsprak di antemano pa traha den sirbishi ku sierto persona den e grupo. Kuminsá hasi esaki for di trempan, en bes di warda te fin di luna. Esaki lo duna bo mas chèns pa duna yudansa amoroso.
12 Tin publikadó enfermo den bo studio di buki ku tin hopi difikultat pa partisipá den sirbishi? Si algun di nan ta biba na lugánan di kuido òf ku no por sali for di kas, ta di komprondé ku nan chèns pa duna testimonio lo ta limitá. Pero dor di probechá di e tiki oportunidat ku nan tin pa laga nan lus bria, nan por konmové esnan ku ta mira nan bon obranan pa haña un berdadero interes den e bèrdat. (Mat. 5:16) Superintendentenan di studio di buki mester hasi sigur ku e rumannan ei ta na haltura ku nan por entregá frakshon di 15 minüt di aktividat di sirbishi di vèlt. Dor ku e publikadónan fiel aki por raportá e tempu ku nan ta prediká esei ta animá nan i duna nan satisfakshon ku ta pone nan sinti goso. Tambe esei ta kontribuí na un informe mundial eksakto di aktividatnan di e pueblo di Dios.
13 Hóbennan Ku Ta Drùk Hasiendo Loke Ta Bon! Esta refreskante ta pa mira hóbennan kristian usa nan forsa i energia den e sirbishi di Yehova! (Pro. 20:29) Si bo ta yòn, kon bo por demostrá bo selo pa Yehova durante e lunanan di aktividat spesial aki?
14 Si ainda bo no ta un publikadó den e kongregashon, bo por hasi esfuerso pa logra e privilegio ei? Hasi bo mes e siguiente preguntanan: ‘Mi tin konosementu básiko di bèrdat bíbliko? Mi kier partisipá den sirbishi di Reino? Mi tin un kondukta ehemplar? Mi ta kapas pa hasi un ekspreshon personal di mi fe dor di papia ku otro hende tokante e bon nobo? Mi ta hasi esei di mi kurason?’ Si bo kontesta riba e preguntanan aki ta sí, papia ku bo mayornan tokante bo deseo di bira publikadó. Bo mayornan por aserká un di e ansianonan ku ta den e komité di sirbishi.
15 Si bo ta un publikadó di e bon nobo kaba, ta posibel pa bo probechá di bo fakansi pa bo traha mas den sirbishi? Ku un bon programa i yudansa di mayornan i di otro hende, hopi hóben batisá a logra traha pionero ousiliar. Si esei no ta posibel, sea determiná pa oumentá bo partisipashon den sirbishi di vèlt. Pone un meta pa bo mes. Ademas di e meta di traha sierto kantidat di ora, pone un otro meta ku tin di haber ku e kualidat di bo sirbishi. Tal bes bo por purba kompartí un teksto na kada porta, mehorá e kualidat di bo rebishitanan, kuminsá un studio di Beibel òf oumentá bo sirbishi dor di inkluí algun otro rasgo di sirbishi. Ke tal di e meta pa bin ku un bisiña, kompañero di skol òf un famia na Memorial di e aña aki? Bo pleno partisipashon den aktividatnan teokrátiko lo ta rekompensador i siguramente lo enkurashá otro hende den e kongregashon.—1 Tes. 5:11.
16 Yuda Esnan Nobo Progresá: Durante e aña di sirbishi ku a pasa, un promedio di 1.959 studio di Beibel a ser kondusí pa luna riba e islanan ABC. Ku tempu, hopi di e studiantenan aki lo progresá te na e punto di dedikashon i boutismo. Sin embargo, promé ku nan logra e meta ei, nos mester yuda nan kualifiká komo publikadó di e bon nobo. Esaki ta un paso importante den siña esnan ku ta nobo pa bira siguidó di Hesukristu. (Mat. 9:9; Luk. 6:40) Bo tin un studiante di Beibel ku ta kla pa dal e paso ei?
17 Si bo no ta sigur di e progreso di bo studiante, buska yudansa di bo superintendente di studio di buki òf e superintendente di sirbishi. Talbes bo por invit’é pa bai e studio ku bo. E rumannan aki tin eksperensia balioso ku por ser usá pa evaluá e progreso spiritual di e studiante. Kisas nan tin sugerensia ku lo yuda e studiante pa sigui hasi progreso spiritual.
18 Ora bo studiante ekspresá interes pa bira un publikadó ku no ta batisá i bo ta pensa ku e ta kualifiká, papia ku e superintendente presidente. E lo hasi areglo pa dos ansiano reuní huntu ku bo i e studiante pa wak si e ta kualifiká, usando e informashon di e buki Nos Ministerio, na página 98-9. (Mira E Toren di Vigilansia, na spañó, di 15 di novèmber 1988, página 17.) Si e studiante ta kualifiká pa bira un publikadó, bo tin ku kuminsá entren’é mesora. Asina ku e entregá un rapòrt di sirbishi di vèlt, lo informá e kongregashon ku e studiante ta un publikadó ku no ta batisá. Nos ta spera ku sentenáres di publikadó nobo, tantu hóben komo hende grandi, por alkansá e momentu importante aki durante e lunanan di aktividat spesial aki.
19 Ku Bon Planiamentu Mas Tantu Bon Ta Ser Lográ: Si nos plania di antemano esei lo kontribuí na e éksito di nos aktividatnan teokrátiko durante e temporada di Memorial aki. (Pro. 21:5) Tin hopi asuntu ku ansianonan mester presta atenshon na dje.
20 Pa yuda e kongregashon logra lo máksimo den sirbishi di vèlt, ansianonan tin ku hasi areglo práktiko pa tene reunionnan pa sirbishi di vèlt durante siman i den wikènt. E superintendente di sirbishi tin ku hiba delantera den hasi e areglonan aki. Ta posibel pa tene reunionnan adishonal mainta trempan, atardi òf promé ku anochi sera? Mester informá e kongregashon di e areglonan aki. Kisas lo ta bon pa pega e programa riba bòrchi di e kongregashon.
21 E ansianonan tin ku perkurá pa e areglonan pa Memorial ta hasí hopi promé ku 16 di aprel. Esaki ta inkluí kordiná e uso di e Salòn di Reino ku otro kongregashonnan ku ta reuní einan, limpiesa di e Salòn di Reino, skohe ùsher i esnan ku ta pasa ku e emblemanan, i optené e emblemanan. Mester informá e kongregashon ki ora i na unda e Memorial lo tuma lugá i di kualkier ahuste den e orario di reunion pa e siman ei. Dor di perkurá diligentemente pa e kosnan aki e selebrashon lo “sosodé korektamente i na un manera ordená.”—1 Kor. 14:40.
22 Kabesnan di famia tal bes lo kier usa un parti di nan studio di famia pa konsiderá kon e famia lo por partisipá den e aktividat èkstra ku tin durante e temporada di Memorial. Henter bo famia lo por traha pionero ousiliar? Òf e famia lo por yuda un òf mas miembro di famia pa hasi esei? Si esei no ta posibel, pone meta spesífiko komo famia pa traha mas tempu den sirbishi. Tin un miembro di famia mas hóben kende lo por kualifiká pa bira un publikadó ku no ta batisá si e haña djis un tiki animashon i yudansa? Kuantu hende bo famia lo por invitá pa Memorial di e aña aki? Bon planiamentu lo trese hopi bendishon i goso pa bo famia.
23 Probechá Plenamente di e Tempu Ku A Keda: Ora apòstel Pedro a skirbi e kristiannan di promé siglo, el a rekordá nan di e urgensia di e tempu pasobra e fin di e sistema hudiu a yega serka. (1 Ped. 4:7) Awor tur kos ta indiká ku e fin di e sistema di kosnan di e mundu aktual ta djis tras di porta. Dia tras dia, nos manera di biba mester reflehá e konvikshon ei. Komo sirbidónan seloso di Yehova, nos mester konsentrá riba e trabou urgente di deklará e bon nobo.—Tito 2:13, 14.
24 Awor ta e tempu pa demostrá selo i akshon! Meditá riba loke Yehova a hasi pa bo, pa bo famia i pa e kongregashon. Maske nos no por paga Yehova nunka pa e kantidat di benefisio ku nos a risibí di dje, loke si nos por hasi ta rindi adorashon di henter nos alma na dje. (Sal. 116:12-14) Nos esfuersonan diligente lo ser rekompensá ku bendishon djariba. (Pro. 10:22) Laga nos tur desplegá ‘selo pa loke ta bon’ durante e temporada spesial aki di èkstra aktividat, di manera “ku den tur kos Dios por wòrdu glorifiká pa medio di Hesukristu.”—1 Ped. 3:13; 4:11.
[Box on page 3]
Asistensia Mundial na Memorial
1999 14.088.751
2000 14.872.086
2001 15.374.986
2002 15.597.746
[Box on page 4]
Ken Lo Bo Invitá pa Memorial?
□ Famia yegá i otro famianan
□ Bisiña- i konosínan
□ Koleganan di trabou i kompañeronan di skol
□ Rebishita- i studiantenan di Beibel
[Box on page 5]
Yuda Esnan Ku Asistí na Memorial
□ Duna un kaluroso bonbiní
□ Rebishitá nan
□ Ofresé nan un studio di Beibel
□ Invitá nan pa e diskurso spesial
[Picture on page 5]
Kiko Ta Bo Metanan pa e Temporada di Memorial?
□ Bin Memorial ku un hende ku bo a invitá
□ Kualifiká komo un publikadó di e bon nobo
□ Traha un sierto kantidat di ora den sirbishi
□ Mehorá den un sierto rasgo di sirbishi
□ Traha komo pionero ousiliar