Caha Di Pregunta

◼ Ken mester haci oracion na reunionnan di congregacion?

Oracion den congregacion ta un parti vital di nos adoracion. Representá otro hende dilanti Jehova ta un privilegio precioso, pero tambe e ta un responsabilidad pisá. En bista di su importancia, ancianonan tin cu usa bon huicio ora di dicidí cua ruman hombernan ta cualificá pa haci oracion na reunion. Ruman hombernan bautisá cu ta representá e congregacion mester ta ministernan cristian maduro cu ta conocí como bon ehempel i mester tin e respet dje congregacion. Nan oracion humilde i respetuoso mester revelá un excelente relacion cu Jehova Dios. E artículo “Haci Oracion cu un Curason Humilde Dilanti Otronan” den E Toren di Vigilancia na spañó di 15 di mei 1986, ta describí principionan importante cu ta útil foral pa esnan cu ta haci oracion público na fabor dje congregacion.

E ancianonan lo no laga un ruman homber haci oracion si e ta conocí pa su conducta cuestionabel of di poco seriedad. Nan lo no scoge un ruman cu ta bira malcontentu lihé of cu gusta usa oracion público pa expresá diferencianan personal. (1 Tim. 2:8) Maske un ruman homber tiener por ta bautisá, e ancianonan mester wak si e tin e madures spiritual pa haci oracion na fabor dje congregacion.—Echonan 16:1, 2.

De bes en cuando na reunionnan pa sirbishi di veld, por ta necesario pa un ruman muher bautisá haci oracion si no tin ruman homber cualificá pa representá e grupo. E ruman muher tin cu tapa su cabes apropiadamente. Si ta probabel cu lo no tin ruman homber cualificá presente na cierto reunionnan pa sirbishi di veld, e ancianonan mester asigná un ruman muher cualificá pa hiba delantera.

Ta custumber cu e presidente dje Reunion Público ta haci e oracion di apertura. Sin embargo, na otro reunionnan di congregacion, ora tin mas cu un par di ruman homber cualificá disponibel, por pidi un otro ruman, fuera di esun cu ta habri e reunion of esun asigná cu e último parti, pa haci e oracion di apertura of di conclusion. En todo caso, mester informá un ruman di antemano cu e ta bai haci oracion na un reunion di congregacion, ya e por pensa riba kico lo e bisa. Ya e ora ei e por haci un oracion coherente i sincero cu ta apropiado pa e reunion ei en particular.

Oracionnan asina no tin nodi ta largu. Ora un ruman homber haci un oracion público, por lo general lo comprend’é mihó si e lanta para, expresá su mes cu suficiente volúmen i papia cla. Esaki ta permití tur esnan presente tende e oracion i na final bisa un “Amen!” di curason.—1 Cró. 16:36; 1 Cor. 14:16.