Parti 7:—Kon pa Kondusí Estudio di Beibel Progresivo
Hasi Orashon na Estudio
1 Pa studiantenan di Beibel por progresá spiritualmente, Yehova su bendishon ta esensial. (1 Kor. 3:6) P’esei ta na su lugá pa un estudio ku ya ta establesí kuminsá i kaba ku orashon. Hopi bes nos por hasi esaki for di e promé estudio ku un persona religioso. Den kaso di otro studiantenan kisas nos tin ku diserní ki ora ta apropiá pa introdusí orashon. Pa yuda e studiante komprondé dikon nos mester hasi orashon lo bo por usa e tekstonan di Salmo 25:4 i 5 i 1 Juan 5:14. Anto usa tambe Juan 15:16 pa splika e importansia di hasi orashon na Yehova mediante Hesukristu.
2 Ken mester hasi orashon na un estudio di Beibel? Si un ruman hòmber batisá ta kompañá un ruman muhé na un estudio, e ruman hòmber tin ku hasi orashon, ounke kisas ta e ruman muhé ta kondusí e estudio di Beibel, basta ku e tapa su kabes. (1 Kor. 11:5, 10) Di otro banda, si un publikadó di Reino maskulino no-batisá kompañá un ruman muhé na un estudio, e ruman muhé lo hasi orashon. Den e kaso ei e ruman muhé mester tapa su kabes ora e ta hasi orashon i tambe ora e ta kondusí e estudio.
3 Loke Por Pidi den Orashon: Orashon na un estudio di Beibel no tin nodi ta largu, pero mester ta spesífiko. Ademas di pidi Dios su bendishon riba e estudio i gradisié pa e bèrdatnan ku nos a siña, ta na su lugá pa duna alabansa na Yehova komo e Fuente di instrukshon. (Isa. 54:13) Tambe nos por inkluí palabranan ku ta indiká nos interes sinsero den e studiante i nos apresio pa e organisashon ku Yehova ta usa. (1 Tes. 1:2, 3; 2:7, 8) Dor ku nos ta pidi Yehova bendishoná e studiante su esfuersonan pa apliká loke e ta siñando, esaki por yud’é mira e importansia di ser ‘kumplidó di e palabra.’—Sant. 1:22.
4 Orashon na un estudio di Beibel ta duna hopi benefisio. E ta trese Dios su bendishon. (Luk. 11:13) E ta enfatisá e seriedat di studia e Palabra di Dios. Segun ku e studiante ta skucha nos orashon, e ta siña kon pa hasi orashon. (Luk. 6:40) Ademas, orashon ku ta sali for di un kurason yen di amor pa Dios i di gratitut pa su kualidatnan inkomparabel por yuda e studiante kultivá un relashon personal ku Yehova.
[Study Questions]
1. (a) Dikon ta na su lugá pa un estudio di Beibel kuminsá i kaba ku orashon? (b) Kon nos por introdusí orashon na un estudio di Beibel?
2. Ken tin ku hasi orashon ora un ruman hòmber batisá òf ora un publikadó maskulino no-batisá bai un estudio ku un ruman muhé?
3. Kiko ta apropiá pa pidi p’e den orashon na un estudio di Beibel?
4. Ki benefisionan hasimentu di orashon na komienso i fin di un estudio di Beibel ta trese kuné?