Bo Ta Beneficiando Bo Mes?

¹ Miyones di hende awe tin gana di sa con pa vence problema i disfrutá di un bida felis. Ansiosamente nan ta lesa bukinan di guia pa desaroyo i adelanto personal of ta acudí na grupo i organisacionnan pa haña conseho con pa mehorá nan bida. Kisas algun hende por mencioná beneficionan limitá cu nan a ricibí. Sin embargo, husgando a base dje calidad di bida djawe, hende en general a siña disfrutá di un bida trankil i profundamente satisfactorio mediante programanan di instruccion humano? Sigur cu no!—1 Cor. 3:18-20.

² Di otro banda, nos Creador ta percurá grátis e instruccion di mas útil pa tur cu kier scucha. Jehova kier pa tur hende beneficiá di su siñansa. El a percurá generosamente su Palabra inspirá pa guia humanidad den rectitud, i el a laga declará e bon nobo di su Reino den henter e tera. (Sal. 19:7, 8; Mat. 24:14; 2 Tim. 3:16) Un bida berdaderamente felis, ta relacioná directamente cu presta atencion na e mandamentunan di Jehova.—Isa. 48:17, 18.

³ Jehova su guia ta hopi mas superior cu di cualkier buki di guia pa desaroyo i adelanto personal of proyectonan pa mehoracion propio cu mundu ta ofrecé. Nos por obtené berdadero yudansa i beneficionan duradero, si nos probechá plenamente dje percuracionnan di Jehova cu ta pará skirbí den su Palabra i cu su organisacion ta siña.—1 Ped. 3:10-12.

⁴ Beneficiá Bo Mes na Reunionnan di Congregacion: Awe, Jehova ta demostrá berdadero interes den siña nos su camindanan, i nos ta beneficiá dor di presta atencion na su instruccion. Nos cincu reunionnan semanal ta duna evidencia di Jehova su interes amoroso. Ora nos ta asistí na reunionnan di congregacion, nos conocimentu di Dios ta aumentá. Nos ta siña protehá nos mes contra loke ta malu dor di hala cerca Jehova. Dje manera aki nos ta lanta nos ánimo.

⁵ Tin mas. Na reunionnan di congregacion nos por ‘hancha nos mes.’ (2 Cor. 6:13) Esaki ta encerá siña conocé e otro hendenan den congregacion. Nos ta beneficiá di un intercambio di estímulo, manera apostel Pablo a mencioná den su carta na e romanonan. (Rom. 1:11, 12) Ora el a skirbi e hebreonan, el a duna un spiertamentu fuerte na esnan cu kisas tabata desaroyando e custumber di bandoná asociacion cristian.—Heb. 10:24, 25.

⁶ Haña satisfaccion gososo den bida ta relacioná directamente cu ser interesá den bienestar di otro hende. E reunionnan ta animá nos pa busca maneranan pa contribuí n’e felicidad di otro hende. P’esei nos reunionnan cristian sigur ta pa nos beneficio personal i pa beneficio di esnan cu ken nos ta cultivá asociacion sano. Loke ta ser rekerí di nos ta participacion sincero.

⁷ Apostel Pablo a presentá un punto similar den su conseho na Timoteo ora el a skirbi: “Entrená bo mes cu debocion na Dios como bo meta.” (1 Tim. 4:7) Nos por puntra nos mes: ‘Mi ta entrenando mi mes? Mi ta siña saca beneficio for di loke mi ta tende n’e reunionnan di congregacion?’ Nos contesta lo ta sí, si nos ta presta atencion na loke nos ta tende n’e reunionnan i ta haci esfuerso pa aplicá loke nos siña. Cu wowo di fe, nos mester por mira mas ayá dje rumannan cu ta presentá e siñansa i mira Jehova como e Magnífico Instructor di su pueblo.—Isa. 30:20.

⁸ Scol di Ministerio Teocrático i Reunion di Sirbishi: E dos reunionnan aki ta diseñá pa yuda nos ser eficas den e ministerio cristian. E Scol di Ministerio Teocrático su nomber ta papia pa su mes, e ta un scol cu studiantenan cu ta ricibí instruccion i conseho riba un base regular. Bo tin e oportunidad pa demostrá bo adelanto como un orador público i como un maestro dje Palabra di Dios. Pero pa saca máximo probecho dje scol, bo tin cu inscribí den e scol, asistí na dje, participá regularmente, i hinca bo curason den bo asignacionnan. Loke lo yuda bo haci adelanto ta aceptá i aplicá e conseho duná.

⁹ E Reunion di Sirbishi ta siña nos e importancia dje ministerio cristian i ta mustra nos con nos por participá den e trabou di haci disipel. Abo cu bo famia ta beneficiando plenamente di loke ta ser presentá den e dos reunionnan aki? Un pareha cristian ta bisa: “Na un Reunion di Sirbishi, nos a tende cu nos mester considerá e texto di dia como famia. Nos no tabata haci esaki, pero awor sí nos ta hacié.” Con nan a beneficiá nan mes? Nan ta admití: “Nos ta ripará cu nos combersacionnan na mesa ta mas agradabel. No tin pleitamentu mas durante cena.” Yunan chikitu tambe ta beneficiá dje reunionnan? Sí. E mama ta bisa: “Ta bisto cu e reunionnan tin un efecto profundo riba nos yunan. Un cierto siman, nos a gara nos yu homber di seis aña ta gaña. Pero e siman ei na reunion, e discurso di instruccion tabata tocante gañamentu. El a hisa cara wak su tata cu un expresion sumamente culpabel riba su cara, i a krimp bai abou den su stul. El a siña su les, i despues nos no tabatin mas problema cu esei.”

¹⁰ Un ruman muher pionero ta bisa cu e ta contentu cu e sugerencianan pa mehorá nos ministerio cu ta ser duná den e Reunion di Sirbishi. Di con? E ta splica: “Mi ta cai den un rutina monótono. Tin biaha mi ta pensa cu loke Nos Ministerio di Reino ta sugerí lo no funcioná. Pero durante e Reunion di Sirbishi, ora mi tende cu nos mester purb’é, mi ta yena cu entusiasmo pa aplicá e sugerencianan. Esei ta haci e ministerio excitante!” Despues di tabatin vários siman ta aplicá e sugerencia pa purba cuminsá un studio di Bijbel na e bishita inicial, e ruman a cuminsá un studio bíblico na su promé bishita cerca un mucha muher cu tabata haci oracion pidi yudansa.

¹¹ Ora bo tende un discurso cu ta incluí conseho bíblico tocante cosnan personal cu bo ta scoge pa haci, bo ta sinti cu ta Jehova ta papiando directamente cu bo? Un ruman homber a sinti asina. El a bisa: “Recientemente na un reunion, tabatin un discurso den cua e ruman a trata ki formanan di entretenimentu tabata apropiado pa cristiannan i ki formanan tabata inapropiado. Mi tabata gusta wak boxeo na television. Pero despues dje reunion ei, mi a dicidí cu e deporte aki ta cai bou dje categoria di entretenimentu cu lo no ta apropiado pa cristiannan. Pues mi no ta wak e mas.” Sí, aunke e ruman aki a siña gusta algu cu ta violento, humildemente el a reaccioná faborabel riba Jehova su guia.—Sal. 11:5.

¹² Reunion Público, Studio di Toren di Vigilancia i Studio di Buki di Congregacion: E discursonan público cu nos ta tende tur siman ta abarcá un variedad di tema bíblico. Kico bo ta saca for dje discursonan aki? Un esposo cristian a comentá riba e beneficionan cu el a ricibí: “Un discurso público a resaltá tur e frutanan di spiritu. E orador a bisa cu den su mes caso, pa e por a traha riba cultivá e frutanan aki, e tabata scoge un cualidad en particular i traha riba dje pa un siman. Na fin dje siman, el a refleccioná riba con a bai cuné den desplegá e fruta ei den su actividadnan di tur dia. Anto e siguiente siman el a traha riba un otro cualidad. Mi a gusta e idea i mi tambe a cuminsá haci mescos.” Esta un excelente aplicacion di loke el siña!

¹³ E Studio di Toren di Vigilancia ta siña nos aplicá principionan bíblico den vários situacion di bida. Esaki ta yuda nos mantené un mente i curason calmu apesar di ansiedadnan di bida. Tambe e Studio di Toren di Vigilancia ta mantené nos al dia cu e berdad progresivo. Por ehempel, nos no a beneficiá di studia e artículonan di E Toren di Vigilancia di 1 di mei 1999, titulá: “E Cosnan Aki Tin cu Sosodé,” “Laga e Lector Usa Dicernimentu” i “Sea Vigilante i Sea Diligente!”? Ki efecto e studionan aki tabatin riba bo personalmente? Bo accionnan ta mustra cu bo ta tuma na pechu Jesus su spiertamentu tocante futuro? Bo ta preparando bo mes pa e pruebanan cu lo tin den futuro ora nos mira “e cos repugnante cu ta causa desolacion . . . pará den un lugá santu”? (Mat. 24:15-22) Bo metanan i curso di bida ta demostrá cu ta e santificacion di Jehova su nomber ta e cos mas importante pa bo, i no acumulacion di cosnan material? E Studio di Toren di Vigilancia no ta siña nos beneficiá nos mes awor akí?

¹⁴ Pensa riba cuantu cos nos ta siña na e Studio di Buki di Congregacion tur siman. Nos ta studiando actualmente e buki bíblico di Daniel. Den e cuater lunanan cu nos tin ta studia e buki bíblico ei, nos no a mira nos fe crece cada siman? Mescos cu Jehova su profeta stimá Daniel, nos ta fortalecé nos fe pa asina nos por perseverá.

¹⁵ Jehova Ta Siña Nos Hiba un Bida Gososo: Nos ta evitá hopi dolor di curason ora nos presta atencion na e mandamentunan di Dios. Ademas, nos ta experenciá kico kier men hiba un bida gososo. Dor di sigui Jehova su direccion, nos ta bira participante den su trabou, no djis observadó. I esnan cu ta haci e trabou di Dios ta hende felis.—1 Cor. 3:9; Sant. 1:25.

¹⁶ Pensa activamente con lo bo bai aplicá e cosnan cu bo ta tende na reunionnan di congregacion. (Juan 13:17) Sirbi Dios cu entusiasmo i di henter bo curason. Bo goso lo abundá. Bo bida lo bira mas ricu, mas significativo. Sí, lo bo beneficiá bo mes.