Bo Ta Predicá cu Curashi?
1 Apesar cu opositornan a arestá i menasá Pedro cu Juan, nan a sigui declará e mensahe di Reino cu curashi. (Echo. 4:17, 21, 31) Kico predicá cu curashi ta nificá pa nos awe?
2 Duna Testimonio cu Curashi: Un sinónimo pa “curashi” ta “intrépido,” cu ta referí na un persona ‘sin miedu i decididu, cu fortalesa i awante.’ Pa cristiannan berdadero, predicá cu curashi ta nificá cu, ki ora cu presentá un ocasion apropiado pa compartí e bon nobo cu otronan, nan no tin miedu di habri nan boca i papia. (Echo. 4:20; 1 Ped. 3:15) Esei ta nificá cu nos no tin bergwensa dje bon nobo. (Sal. 119:46; Rom. 1:16; 2 Tim. 1:8) Pues, curashi ta un cualidad cu nos tin mester pa efectuá nos comision di predicá e bon nobo di Reino den e tempu aki di fin. E ta impulsá nos pa compartí e bon nobo cu hende unda cu nos haña nan.—Echo. 4:29; 1 Cor. 9:23.
3 Curashi na Scol: Bo inclinacion di tin miedu of ser tímido ta pone cu ta difícil pa bo predicá na bo compañeronan di scol? Tin biaha no ta fácil; de echo, e por ta ègt un reto. Sin embargo, Jehova lo fortalecé bo si den oracion bo pidié duna bo curashi pa predicá na otro hende. (Sal. 138:3) Curashi lo yuda bo bisa hende cu bo ta un Testigo di Jehova, i tambe resistí bofon. Como resultado, bo predicacion na scol por salba esnan cu scucha bo.—1 Tim. 4:16.
4 Curashi na Trabou: Bo ta conocí na trabou como un Testigo di Jehova? Kisas e único manera pa alcansá bo coleganan di trabou cu e bon nobo ta dor di abo predicá na nan. Tambe bo curashi lo yuda bo pa haña liber pa asistí na bo reunionnan i congresonan cristian.
5 Curashi ora Nos Ta bou di Prueba: Ora nos ta confrontá oposicion ta crucial pa nos tuma un curashi. (1 Tes. 2:1, 2) Curashi ta yuda nos tene duru na nos fe ora nos ta enfrentá menasa, bofon of persecucion directo. (Fil. 1:27, 28) E ta fortificá nos pa para firme ora nos ta bou di preshon pa comprometé nos apego n’e normanan di nos Dios, Jehova. E ta fortalecé nos pa keda pacífico ora otro hende ta provocá discusion.—Rom. 12:18.
6 Sea cual sea e dificultadnan personal cu nos ta confrontá, laga nos perseverá den predicá e bon nobo cu curashi.—Efe. 6:18-20.