Ser un Bon Scuchadó
1 Scucha cu atencion ta rekerí disiplina. Tambe e ta rekerí p’e scuchadó tin un deseo di siña i beneficiá di loke e ta tende. P’esei, Jesus a enfatisá e necesidad di “presta atencion na con boso ta scucha.”—Luc. 8:18.
2 Esaki ta aplicá foral ora nos ta asistí na reunion di congregacion, asamblea i congresonan. Esakinan ta ocasionnan caminda nos tin cu scucha cuidadosamente. (Heb. 2:1) Aki ta sigui algun punto cu lo yuda bo ser un bon scuchadó na e reunionnan cristian aki.
◼ Apreciá e balor dje reunionnan. Nan ta e manera principal cu nos ta ser “siñá pa Jehova” mediante “e fiel mayordomo.”—Isa. 54:13; Luc. 12:42.
◼ Prepará di antemano. Repasá e informacion cu lo bai considerá, i haci sigur di bini cu bo Bijbel i ehemplar personal dje publicacion cu ta studia.
◼ Durante e reunionnan, haci un esfuerso special pa concentrá. Mester evitá di papia cu esnan sintá banda di bo of di wak kico otro hende den auditorio ta haci. Purba di no ser distraí dor di pensa riba loke bo ta bai haci despues di reunion of pensa riba otro asuntunan personal.
◼ Analisá loke ta ser presentá. Puntra bo mes: ‘Con esaki ta aplicá na mi? Ki dia mi ta bai aplik’é?’
◼ Haci anotacionnan breve di puntonan principal i di textonan bíblico. Esaki ta yuda bo enfocá bo pensamentunan riba loke ta ser considerá i ta yuda bo corda puntonan clave pa usa despues.
3 Siña Bo Yunan Scucha: Yunan tin mester di instruccion spiritual. (Deu. 31:12) Den tempu antiguo, “tur cu tabata suficiente inteligente pa scucha” i cu a forma parti dje pueblo di Dios mester a paga tinu ora tabata lesa e Ley pa nan. (Neh. 8:1-3) Si mayornan ta absorbá den e reunionnan i ta presta sumo atencion, ta probabel cu nan yunan lo haci mescos. No ta sabí pa bini cu co’i hunga of buki pa kleur pa asina entretené e muchanan. Baimentu di baño innecesariamente tambe ta stroba nan di scucha. Como cu “bobedad ta mará na curason di mucha,” mayornan tin cu haci esfuerso cu empeño pa soru pa nan yunan sinta ketu na reunion i scucha.—Pro. 22:15.
4 Dor di ser bon scuchadó, nos ta duna prueba cu nos ta berdaderamente sabí i kier “ricibí mas instruccion.”—Pro. 1:5.