‘Pone Bon Atenshon Kon Bo Ta Skucha’

PA BO siña ta importante pa bo skucha. I tin biaha skucha por nifiká bida òf morto. Ora Yehova tabata prepará pa libra su pueblo for di sklabitut den Egipto, el a duna Moises sierto instrukshon, i Moises a bisa e ansianonan di Israel kiko nan mester a hasi pa salba nan primogénito for di e angel di morto. (Éks. 12:21-23) Anto e ansianonan a pasa e informashon ei over na kada famia. Komo ku a pasa e informashon aki ku boka, e pueblo tabatin ku skucha bon. Kon nan a reakshoná? Beibel ta informá: “E ora ei e yunan di Israel a bai i a hasi asina; meskos ku SEÑOR a ordená Moises i Aròn, asina nan a hasi.” (Éks. 12:28, 50, 51) Komo resultado, Israel a eksperensiá un liberashon impreshonante.

Awe, Yehova ta prepará nos pa un liberashon asta mas grandi. No tin duda anto ku e instrukshonnan ku e ta duna nos via e reunionnan di kongregashon ta meresé tur nos atenshon. Bo ta sakando pleno probecho di e reunionnan ei? Esei ta dependé hopi di e manera ku bo ta skucha.

Bo ta keda kòrda e puntonan klave di e instrukshon duná na reunion? Bo tin e kustumber di reflekshoná tur siman riba kon bo por pone nan na práktika den bo mes bida òf kon pa kompartí nan ku otro hende?

Prepará Bo Kurason

Pa benefisiá plenamente di e instrukshon perkurá na reunionnan kristian, nos tin ku prepará nos kurason. Loke a tuma lugá durante e reinado di Rei Yehósafat di Huda ta mustra kon importante ta pa hasi esei. Ku kurashi Yehósafat a tuma un posishon firme na fabor di adorashon berdadero. El a “kita e lugánan haltu i e imágennan di Asera for di Huda” i a enkargá prens-, levita- i saserdotenan pa siña e pueblo e Lei di Yehova den tur e statnan di Huda. “E lugánan haltu, sin embargo, no a wòrdu kitá.” (2 Kró. 17:6-9; 20:33) Adorashon di dios falsu i e forma ilegal di adorá Yehova na e lugánan haltu paganu ei tabata asina fuerte ankrá ku no por a eliminá nan.

Dikon e programa edukativo ku Yehósafat a organisá no tabatin un efekto duradero? E relato ta sigui bisa: “E pueblo ainda no a dirigí [“prepará,” NW] nan kurason na e Dios di nan tatanan.” E hudiunan a tende, pero nan no a aktua di akuerdo ku loke nan a tende. Kisas nan tabata haña ku ta muchu molèster pa biaha bai n’e tèmpel na Yerúsalèm pa ofresé sakrifisio. En todo kaso, nan no tabatin un kurason motivá dor di fe.

Pa evitá ku nos ta drif bai bèk den e kamindanan di e mundu di Satanas, nos tin ku prepará nos kurason pa risibí e instrukshon ku Yehova ta perkurá awe. Kon? Un manera importante ta dor di orashon. Nos mester pidi Dios pa e laga nos risibí instrukshon divino ku un aktitut gradisidu. (Sal. 27:4; 95:2) Esaki lo yuda nos apresiá e esfuersonan di nos rumannan ku, maske nan ta imperfekto, ta hasi nan mes disponibel pa Yehova usa nan den siña su pueblo. Esei lo motivá nos pa gradisí Yehova no solamente pa kosnan nobo ku nos ta siña, sino tambe pa e oportunidat di profundisá nos apresio pa kosnan ku nos a yega di siña kaba. E deseo di kumpli ku Dios su boluntat plenamente, ta pone nos resa: “Siña mi bo kaminda, o SEÑOR; . . . uni mi kurason pa teme bo nòmber.”—Sal. 86:11.

Siña Konsentrá

Tin hopi opstákulo ku por stroba nos di skucha ku atenshon. Kisas nos mente ta kargá ku preokupashon. Bochincha i moveshon den ouditorio òf pafó di e lugá di reunion kisas ta distraí nos. Òf nos no ta sinti nos kurpa bon, i ta bira difísil pa nos konsentrá. I tambe mayornan hopi bes tin ku atendé ku nan yunan chikí. Kiko por yuda nos konsentrá riba e programa?

Ya ku nos wowonan tin hopi di haber ku riba kiko nos ta konsentrá, fiha bo bista riba e oradó. Ora e menshoná un teksto bíbliko—asta un teksto konosí—busk’é, i sigui e oradó segun e ta les’é. Resistí e tentashon di bira wak den direkshon di kada zonidu òf moveshon. Si bo laga bo wowonan yena bo mente ku kosnan ku ta distraí bo, lo bo pèrdè gran parti di loke ta ser presentá for di plataforma.

Si kualkier ‘preokupashon’ ta stroba bo di konsentrá riba e programa, pidi Yehova den orashon p’e duna bo e trankilidat di mente i kurason ku bo mester pa bo por paga tinu. (Sal. 94:19; Fil. 4:6, 7) Hasi esei bes tras bes si ta nesesario. (Mat. 7:7, 8) E reunionnan di kongregashon ta un areglo di Yehova. Bo por tin sigur ku e kier pa bo benefisiá di nan.—1 Huan 5:14, 15.

Kon pa Skucha Diskurso

Probablemente bo ta kòrda puntonan masha interesante ku bo a yega di tende den diskurso. Sin embargo, skucha un diskurso ta enserá mas ku djis akumulá algun punto sobresaliente. Un diskurso ta manera un biahe: a lo largu di e ruta podisé tin hopi kos interesante pa mira, pero e kos prinsipal ta e destinashon, e meta. Asina tambe e oradó ta purba dirigí su ouditorio na un sierto konklushon òf motivá nan pa aktua di un sierto manera.

Tuma por ehèmpel Hosué su diskurso na e nashon di Israel, ku ta pará skirbí na Hosué 24:1-15. Su meta tabata pa motivá e pueblo pa tuma un posishon firme na fabor di adorashon berdadero i separá nan mes kompletamente for di e idolatria di e nashonnan rònt di nan. Dikon esei tabata asina importante? E popularidat di adorashon falsu a forma un menasa serio pa e bon relashon ku e nashon tabatin ku Yehova. E pueblo a kontestá e súplika di Hosué bisando: ‘Leu sea di nos di bandoná Yehova pa sirbi otro diosnan. Nos lo sirbi Yehova.’ I nan a hasié tambe!—Hos. 24:16, 18, 31.

Ora bo ta skucha un diskurso, purba determiná kiko ta su meta. Konsiderá kon e puntonan ku e oradó ta trese dilanti ta kontribuí pa yega na e meta ei i puntra bo mes kiko e informashon ta bisa bo pa hasi.

Kon pa Skucha Durante Partinan di Pregunta i Kontesta

E Studio di Toren di Vigilansia, e Studio di Buki di Kongregashon i sierto partinan di e Reunion di Sirbishi ta konsistí di un análisis di un publikashon bíbliko a base di pregunta i kontesta.

Den un sentido, skucha durante un parti di pregunta i kontesta ta manera partisipá den un kòmbersashon. Pa benefisiá plenamente bo tin ku skucha ku atenshon. Opservá den ki rumbo e konsiderashon ta bai. Tuma nota kon e konduktor ta enfatisá e tema i e puntonan prinsipal. Kontestá su preguntanan den bo mente. Skucha bon ora otro hende ta splika i apliká e informashon, podisé nan por yuda bo mira un otro ángulo di un tema konosí. Duna bo aporte na e konsiderashon dor di ofresé bo propio ekspreshonnan di fe.—Rom. 1:12.

Dor di studia e material asigná di antemano lo bo por partisipá den e konsiderashon i sigui e komentarionan di otronan. Si bo sirkunstansianan ta stroba bo di studia e material a fondo, tuma por lo ménos un par di minüt pa haña un idea general di e informashon promé ku e reunion. Esaki lo yuda bo saka mas for di e parti.

Kon pa Skucha na Asamblea i Kongreso

Na asamblea i kongreso probablemente lo tin mas kos pa kita bo atenshon kompará ku na reunionnan di kongregashon. P’esei lo ta mas difísil pa paga bon tinu. Kiko por yuda nos?

Un faktor importante ta pa sosegá sufisiente anochi. Promé ku e programa kuminsá, graba e tema di dia bon den bo mente. Wak e tema di kada diskurso, i purba imaginá kiko lo ser presentá. Hasi bon uso di bo Beibel. Hopi hende ku ta asistí ta ripará ku ora nan hasi anotashonnan kòrtiku di puntonan prinsipal, nan ta konsentrá mihó riba e programa. Anotá loke bo tin pensá di pone na práktika den bo bida òf den sirbishi di vèlt. Kòmbersá kada dia riba algun di e puntonan presentá ora bo ta riba kaminda pa e lugá di asamblea i ora di bai kas bèk. Esaki lo yuda bo keda kòrda e informashon.

Siña Bo Yunan Skucha

Mayornan kristian por yuda nan yunan—asta yu chikí—“haña sabiduria ku ta hiba na salbashon” dor di bini ku nan na e reunionnan di kongregashon, asambleanan i kongresonan. (2 Tim. 3:15) No ta tur mucha tin e mesun aktitut i kapasidat di konsentrá, p’esei ta abo komo mayor mester sa kon pa siña nan skucha ku atenshon. Podisé e siguiente sugerensianan ta práktiko pa bo.

Na kas, pone bo yunan chikí sinta ketu durante sierto oranan fiho pa lesa òf wak e plachinan den nos publikashonnan kristian. No bini reunion ku ko’i hunga pa entretené yu chikí. Manera tabata e kaso den antiguo Israel, awe tambe muchanan ta presente “pa nan tende i siña.” (Deu. 31:12) Kaminda ta práktiko, algun mayor ta duna asta yunan hopi chikí nan ehemplar personal di e publikashon ku ta ser studiá. Segun ku yunan ta bira mas grandi, yuda nan prepará pa nan por partisipá den programanan ku ta rekerí komentario di ouditorio.

E Skritura ta revelá ku tin un relashon direkto entre skucha Yehova i obedes’é. Nos por mira esaki den e palabranan di Moises na e nashon di Israel: “Mi a pone bida i morto boso dilanti, e bendishon i e maldishon. P’esei, skohe bida . . . dor di stima SEÑOR bo Dios, dor di obedesé su bos i dor di tene duru na dje.” (Deu. 30:19, 20) Awe ta esensial pa nos skucha loke Yehova ta siña nos i pon’é na práktika, pasobra ta asina so nos lo gana Dios su aprobashon i e bendishon di bida eterno. Ta vital anto pa nos hasi kaso di e spièrtamentu di Hesus: “Pone bon atenshon kon boso ta skucha”!—Luk. 8:18.