Amor Ta Motivá Nos pa Predicá
1 Como Testigonan di Jehova, nos ta mas conocí como predicadó celoso dje mensahe di Reino. (Mat. 24:14) Mundialmente tin mas cu seis miyon persona activo; ora personanan nobo djoin nos den e predicacion ta agregá nan n’e cantidad ei. E cantidad ta ser calculá a base di participacion den e trabou aki.
2 Kico ta motivá nos pa ofrecé nos mes pa un asignacion desafiante asina? No ta forsa nan ta forsa nos, ni tenta nos cu ganashi material ni ofrecé nos onornan special. Na promé instante, hopi di nos tabatin miedu dor cu nos no a sinti nos cualificá, i e reaccion dje público tabata hopi bes negativo. (Mat. 24:9) Mayoria observadó no por comprendé ta kico ta motivá nos. Mester tin un motibu fuerte pakico nos ta perseverá.
3 E Poder di Amor: Jesus a identificá e mandamentu di mas grandi ora el a declará cu nos ‘tin cu stima Jehova cu henter nos curason, alma, mente i forsa.’ (Mar. 12:30) Nos amor pa Jehova ta ankrá den sintimentunan profundo di aprecio pa loke e ta: e Gobernante Soberano, Creador di tur cos, esun cu ta ‘digno di ricibí gloria, onor i poder.’ (Rev. 4:11) Su cualidadnan maraviyoso ta sin comparacion.—Éx. 34:6, 7.
4 E echo cu nos conocé Jehova i ta stim’é, ta motivá nos pa laga nos lus briya dilanti hende. (Mat. 5:16) Nos lus ta briya ora nos ta alab’é públicamente, ta papia tocante su obranan maraviyoso i ta plama e mensahe tocante su Reino. Mescos cu e angel bulando meimei di shelu, nos tin “bon nobo eterno pa declará como noticia alegre . . . na tur nacion i tribu i lenga i pueblo.” (Rev. 14:6) Nos amor ta e forsa motivador tras dje obra mundial di predicacion.
5 Mundu ta mira nos predicacion como un “bobedad” cu mester ignorá. (1 Cor. 1:18) Na hopi lugá nan a haci esfuerso pa frena nos trabou. Nos amor leal a fortalecé nos pa declará mescos cu e apostelnan: “Nos no por stop di papia tocante loke nos a mira i a tende. . . . Nos tin cu obedecé Dios como gobernante mas bien cu hende.” (Echo. 4:20; 5:29) Apesar di oposicion, e trabou di predicá ta sigui expandé den tur parti di tera.
6 Nos amor pa Jehova ta manera un candela ardiente cu ta obligá nos declará na tur parti su excelencianan. (Jer. 20:9; 1 Ped. 2:9) Nos lo sigui “duna di conocé entre pueblonan su manera di trata . . . pasobra el a obra di manera sobresaliente”!—Isa. 12:4, 5.