Yuda Otro Hende Asistí na Reunion
1 “Cualkier amigu den becindario . . . cu ta deseá di asistí na e reunionnan ta cordialmente invitá pa haci esei.” Desde cu e anuncio aki a sali den e edicion di november 1880 di Zion’s Watch Tower, Testigonan di Jehova ansiosamente a invitá hende pa reuní huntu pa ricibí instruccion bíblico. (Rev. 22:17) Esaki ta un parti esencial di adoracion berdadero.
2 Ta Vital pa Asistí: Ora nos ta asociá cu e congregacion esei ta resultá den bendicion. Nos ta siña conocé nos Dios maraviyoso, Jehova, mihó. Den congregacion, nos ta reuní huntu pa ser “siñá pa Jehova.” (Isa. 54:13) Su organisacion ta presentá un programa continuo di instruccion bíblico cu ta hala nos mas cerca dje i ta duna yudansa práctico pa aplicá “tur e conseho di Dios.” (Echo. 20:27; Luc. 12:42) E reunionnan ta percurá entrenamentu personal den e arte di siña otronan e Palabra di Dios. Recordatorionan for dje Scritura ta yuda nos disfrutá di bon relacion cu otro hende i cu Jehova mes. Asociacion cu esnan cu ta stima Dios ta fortificá nos fe.—Rom. 1:11, 12.
3 Haci un Invitacion Directo: Invitá tur studiante di Bijbel na reunion for dje promé studio. Dun’é un pamfleta cu e orario. Stimulá su interes dor di compartí cuné un punto for dje último reunion cu a animá bo i dor di considerá algu cu lo ser tratá na e siguiente reunion. Describí con e Salon di Reino ta, i haci sigur cu e sa con pa hañ’é.
4 Si un studiante no cuminsá asistí mesora, sigui invit’é. Tuma un par di minuut tur siman pa mustr’é con nos organisacion ta funcioná. Usa e foyeto Testigonan di Jehova—Ken Nan Ta? Kico Nan Ta Kere? (publicá na spañó i ingles) i e video Testigonan di Jehova—E Organisacion Tras dje Nomber pa familiarisá e studiante cu nos i cu nos reunionnan. Bishitá e studiante huntu cu otro publicadó pa e cera conocí cu nan. Den oracion, gradicí Jehova pa e organisacion i mencioná e necesidad pa e studiante asociá cuné.
5 No vacilá pa yuda esnan recien interesá pa nan congregá cu nos. Segun cu nan aprecio pa Jehova ta crece, nan lo ser impulsá pa aplicá loke nan ta siña i bira parti di Dios su organisacion uní.—1 Cor. 14:25.