Dirigiendo Studiantenan n’e Organisacion Tras di Nos Nomber
1 “E ta un mensahe cu ta ser duná den mas cu 200 idioma. E ta un mensahe tendé den mas cu 210 pais. E ta un mensahe entregá personalmente tur caminda cu bo por haña hende. E ta parti dje campaña di predicacion mas grandi cu e mundu hamas a conocé, un mensahe cu ta uni miyones di hende rond parti mundu. Testigonan di Jehova ta organisá pa efectuá e trabou aki pa mas cu shen aña!”
2 Asina e naracion dje video Los testigos de Jehová... La organización tras el nombre ta cuminsá. E ta pasa na contestá e preguntanan: Ken Testigonan di Jehova ta realmente? Con nan actividad ta organisá? Dirigí? Financiá? E ta convencé esnan cu wak e dje echo cu “Testigonan di Jehova mundialmente a ser entrená como organisacion pa yuda nan próhimo desaroyá fe den Bijbel,” i e ta animá nan pa mira pa nan mes e organisacion tras di nos nomber. Despues di a mira e video aki, un señora cu tabata studia a basha na yoramentu cu lágrimanan di goso i aprecio i a bisa: “Con un hende por keda sin mira cu esaki ta e organisacion dje Dios berdadero, Jehova?”—Compará cu 1 Corintionan 14:24, 25.
3 Un otro señora a studia Bijbel un si un no pa hopi tempu, pero e no por a aceptá e echo cu e Trinidad ta un doctrina falsu. Anto a mustra e cu su esposo nos video. Nan a keda masha impresioná cu e presentacion i a wak e dos biaha e mésun anochi ei. Na nan siguiente studio, e señora a expresá su deseo pa bira un Testigo. El a bisa cu e tabata concentrá riba su creencia den e Trinidad i a keda sin mira nos organisacion i e hendenan den dje. Dor dje video el a realisá cu el a haña Dios su organisacion berdadero. E tabata kier a cuminsá predicá di cas pa cas mesora. Despues cu a splik’é cua tabata e pasonan necesario pa bira un publicador no-bautisá, e di: “Laga nos cuminsá traha riba nan mesora.” El a kita su nomber for di su iglesia, a cuminsá den e actividad di sirbishi di veld, i a bira experto den refutá e Trinidad.
4 A ser probá cabalmente cu studiantenan di Bijbel ta haci mihó progreso spiritual i ta crece mas rápidamente na madures ora nan reconocé Jehova su organisacion i asociá cuné. Ta significante cu despues cu e 3.000 hendenan a bautisá na Pentecoste, “nan a sigui dedicá nan mes n’e siñansa dje apostelnan i na asociá huntu.” (Echo. 2:42, nota) Ta esencial pa nos yuda studiantenan haci mescos awe. Con nos por hacié?
5 Carga e Responsabilidad: Tur hacidó di disipel mester realisá cu ta su responsabilidad pa dirigí e studiante di Bijbel na Dios su organisacion. (1 Tim. 4:16) Mester mira cada sesion di studio como un stap mas cerca den direccion dje dia felis ora cu esun nobo lo simbolisá su dedicacion na Jehova mediante bautismo bou di awa. Un dje preguntanan cu lo puntr’é durante e ceremonia di bautismo ta: “Bo ta comprendé cu bo dedicacion i bautismo ta identificá bo como un Testigo di Jehova den asociacion cu Dios su organisacion dirigí pa spiritu?” Pues, ta importante p’e realisá cu e no por sirbi Dios sin asociá activamente cu e berdadero congregacion cristian.—Mat. 24:45-47; Juan 6:68; 2 Cor. 5:20.
6 Sigui educá e studiante tocante e congregacion local i e organisacion internacional tras di Testigonan di Jehova. Haci esaki na cada sesion di studio di Bijbel, cuminsando cu e promé. For di cuminsamentu mes, invitá e studiante n’e reunionnan, i sigui invit’é.—Rev. 22:17.
7 Usa e Hermentnan cu Ta Ser Percurá: Nos mihó publicacionnan pa usa den conducí studionan di Bijbel na cas ta e foyeto Kico Dios Ta Rekerí di Nos? i e buki Conocimentu cu Ta Hiba na Bida Eterno. Tur dos ta resaltá e necesidad pa asociá cu e congregacion. Na fin di les 5, e foyeto Rekerí ta declará: “Bo mester sigui siña tocante Jehova i obedecé su rekisitonan. Asistiendo n’e reunionnan na e Salon di Reino local di Testigonan di Jehova lo yudá bo haci esei.” E buki Conocimentu repetidamente ta animá e studiante pa asociá n’e reunionnan. Capítulo 5, §22, ta extendé e invitacion aki: “Testigonan di Jehova . . . calurosamente ta instá bo pa participá cu nan den adorá Dios ‘cu spiritu i cu berdad.’ (Juan 4:24)” Capítulo 12, §16, ta declará: “Segun cu bo ta sigui e studio aki i hacié bo custumber pa asistí na e reunionnan di Testigonan di Jehova, bo fe lo ser fortificá asta mas.” Capítulo 16, §20, ta bisa: “Hacié bo custumber pa asistí na e reunionnan di Testigonan di Jehova.” E ta agregá: “Esaki lo yudá bo comprendé i despues aplicá e conocimentu di Dios den bo bida i lo trece felicidad pa bo. Dor di ser parti dje hermandad cristian mundial lo yudá bo keda pegá na Jehova.” Capítulo 17 ta splica cabalmente con un persona ta haña berdadero siguridad entre e pueblo di Dios. Ora nos ta studia cu otronan, ta nos responsabilidad pa enfatisá e porcionnan aki dje material.
8 E foyeto Testigo di Jehova ta haci unidamente e boluntad di Dios den tur e mundo ta un herment excelente cu a ser producí pa cera hende conocí cu e único organisacion visibel cu Jehova ta usando awe pa cumpli cu su boluntad. E informacion detayá cu e ta contené tocante nos ministerio, reunionnan i organisacion lo animá e lector pa asociá cu nos den adorá Dios. Una bes a establecé un studio di Bijbel, ta ser recomendá pa nos duna e studiante un copia dje foyeto aki p’e lesa riba su mes. No tin nodi studi’é cuné manera nos tabata haci ántes.
9 Algun dje videonan cu Sociedad a producí ta hermentnan excelente pa dirigí studiantenan n’e organisacion tras di nos nomber. Lo ta bon si nan lo por wak (1) La Sociedad del Nuevo Mundo en acción, un repaso dje film di 1954 cu a capturá e spiritu suave, eficiente i amoroso cu cua Jehova su organisacion ta funcioná; (2) Unidos gracias a la enseñanza divina, cua ta examiná e unidad pacífico cu a ser desplegá na nos congresonan internacional na Oost Europa, Sur América, Africa i Asia; (3) Hasta los cabos de la Tierra, cua a marca e di 50 aniversario dje Scol Bíblico di Galad di Watchtower i ta mustra e efecto cu e misioneronan tabatin riba e trabou di predicá rond mundu; (4) Jehovah’s Witnesses Stand Firm Against Nazi Assault, cua ta conta e relato emocionante dje curashi i triunfo dje Testigonan ora nan a confrontá Hitler su persecucion brutal; i, naturalmente, (5) Los testigos de Jehová... La organización tras el nombre.
10 Fiha Metanan Progresivo pa Loke Ta e Reunionnan: Mester splica e studiantenan cu nos tin mester di tantu e les privá cu ta ser percurá mediante e studio di Bijbel na cas como dje consideracionnan den grupo cu ta ser percurá n’e reunionnan di congregacion. (Juan 6:45) Un persona nobo tin cu progresá mes tantu den su comprendimentu dje Scritura como dje organisacion. Pa logra esei, no por substituí asistencia na reunionnan. (Heb. 10:23-25) Cuminsá invitá e persona mesora na reunionnan di congregacion. Algun persona recien interesá ta cuminsá asistí na reunionnan di congregacion asta promé cu nan tin un studio di Bijbel regular na cas. Naturalmente, nos mes kier pone e ehempel corecto dor di ta presente regularmente na reunion.—Luc. 6:40; Fil. 3:17.
11 Compartí suficiente informacion tocante e reunionnan i con nan ta ser conducí di manera cu e studiante lo sintié cómodo ora e asistí na su promé reunion. Ya cu algun hende ta sinti nan masha incómodo ora nan bai lugánan nobo pa promé biaha, tal bes ta probechoso pa compañá e studiante bai Salon di Reino ora e ta asistí na su promé reunion. Lo e sintié mas cómodo si bo ta cuné ora e topa miembronan dje congregacion. Riba tur cos, sea un bon anfitrion pa bo bishitante i lagu’é sintié bon biní i cómodo.—Mat. 7:12; Fil. 2:1-4.
12 Animá e studiante pa asistí na un dia special di asamblea, asamblea di circuito of congreso di distrito n’e promé oportunidad cu presentá. Kisas bo por incluyé den bo areglonan di transporte.
13 Inculcá Aprecio Sincero: Organisá pa Cumpli cu Nos Ministerio, página 92, ta splica: “Si bo propio aprecio profundo p’e organisacion di Jehova ta ser reflehá den bo combersacionnan cu hende interesá, lo ta mas fácil pa nan crece den aprecio i lo impulsá nan pa haci mayor progreso den gana conocimentu di Jehova.” Semper papia positivamente, nunca negativamente, tocante bo congregacion local. (Sal. 84:10; 133:1, 3b) Den e oracionnan cu bo ta haci n’e studio di Bijbel, mencioná e congregacion i e studiante su necesidad pa asociá regularmente cuné.—Efe. 1:15-17.
14 Nos siguramente kier pa esnan nobo desaroyá aprecio sincero pa e compañerismo encantador i siguridad spiritual cu ta ser hañá den e pueblo di Dios. (1 Tim. 3:15; 1 Ped. 2:17; 5:9) Como Testigo di Jehova, laga nos haci tur loke nos por pa dirigí studiantenan dje Palabra di Dios n’e organisacion tras di nos nomber.
[Blurb on page 3]
Studiantenan ta haci progreso spiritual mas rápido ora nan mira e organisacion pa nan mes
[Blurb on page 4]
No tarda pa invitá studiantenan pa asistí n’e reunionnan