Parti 8—Kon pa Kondusí Estudio di Beibel Progresivo
Dirigí Studiantenan na e Organisashon
1 E meta ku nos ke logra studiando Beibel ku otro hende no ta solamente pa duna e studiantenan informashon enkuanto doktrina sino tambe pa yuda nan bira parti di e kongregashon kristian. (Zak. 8:23) E foyeto Testigonan di Jehova—Ken Nan Ta? Kico Ta Nan Creencianan?, por yuda nos hasi esaki. Laga un ehemplar serka kada studiante di Beibel nobo i animá nan pa les’é. Ademas, tuma un par di minüt tur siman na e estudio pa kompartí un punto tokante Yehova su organisashon.
2 Reunionnan di Kongregashon: E manera prinsipal den kua studiantenan di Beibel ta kuminsá apresiá e organisashon di Dios ta dor di asosiá ku nos na e reunionnan di kongregashon. (1 Kor. 14:24, 25) P’esei, kisas bo por laga nan sera konosí ku e reunionnan dor di kada siman deskribí un di e sinku reunionnan semanal. Menshoná e tema di e siguiente diskurso públiko. Mustra nan e informashon ku lo ser konsiderá den e Estudio di Toren di Vigilansia i na e Estudio di Buki di Kongregashon. Deskribí e Skol di Ministerio Teokrátiko i e Reunion di Sirbishi. Ora bo tin un parti den e skol, kisas bo por repas’é ku nan. Konta nan di puntonan sobresaliente ku a bin padilanti na e reunionnan. Usa plachinan den nos publikashonnan pa yuda nan visualisá loke ta tuma lugá. Invitá nan na reunion for di e promé bes ku bo studia ku nan.
3 Ora e dia di e Memorial, asamblea i e bishita di superintendente di sirkuito ta yegando serka, tuma un par di minüt pa splika i lanta entusiasmo pa e areglonan aki. Gradualmente, kontestá preguntanan manera: Dikon nos tin e nòmber Testigunan di Yehova? Dikon nos ta yama e sitionan kaminda nos ta reuní Salòn di Reino? Kiko e trabou di ansiano- i sirbidónan ministerial ta enserá? Kon e trabou di prediká, i e teritorio ta organisá? Kon ta produsí nos literatura? Kon e organisashon ta ser finansiá? Ki papel e ofisina di sukursal i e Kuerpo Gobernante ta hunga den supervishon di e obra?
4 Vidionan Instruktivo: Un otro manera ku studiantenan di Beibel por mira Yehova su maravioso organisashon ta mediante nos vidionan. Esakinan por hiba e studiantenan Te na e Finnan di Tera, laga nan ser konosí ku Henter Nos Asosiashon di Ruman i mustra nan kon nos ta Uní pa Medio di Siñansa Divino. E vidio Testigonan di Jehova—E Organisacion Tras dje Nòmber a pone awa basha for di wowo di un señora ku tabatin sinku aña ta risibí nos revistanan i otro literatura. Ku tempu el a siña konfia e Testigunan ku tabata bishit’é, pero despues di a wak e vidio el a sinti ku e por konfia e organisashon tambe. A kuminsá un estudio kuné, i e siguiente siman el a asistí na e reunionnan na Salòn di Reino.
5 Dor di dediká un par di minüt tur siman na nos studiantenan i usa e publikashonnan disponibel, na un manera progresivo nos por dirigí studiantenan di Beibel na e úniko organisashon ku Yehova ta usa awe.
[Study Questions]
1. Dikon ta bon pa tur siman na un estudio di Beibel nos trata un punto tokante e organisashon di Yehova?
2. Kon bo por animá studiantenan di Beibel pa asistí na reunionnan di kongregashon?
3. Kua rasgonan di e organisashon nos por papia di dje?
4, 5. Kon nos vidionan por oumentá komprondementu i gratitut pa e organisashon?