“Mi Ta Para Firme! Mi Ta Para Firme! Mi Ta Para Firme!”
1 E palabranan ei di un cristian fiel cu a sobrebibí e Holocausto ta resoná e determinacion di miles di Testigo—bibu i morto—cu tabata decididu den nan creencianan apesar di crueldad di nazi. (Efe. 6:11, 13) Nan emocionante relato di curashi i triunfo ta ser contá den e video conmovedor Testigonan di Jehova Ta Para Firme Contra Atake Nazi. Nos ta urgi tur hende den congregacion pa wak e i compartí nan impresion i sintimentunan cu otro.
2 Laga e preguntanan aki stimulá bo pensamentu: (1) Pa ki motibu Testigonan di Jehova a tuma un posicion firme contra e nazinan? (2a) Ki cuestion a lanta relacioná cu un saludo, i di con? (2b) Con esaki a afectá famianan Testigo? (3) Cuantu Testigo nan a manda campo di concentracion, con tabata identificá nan einan, i con Gestapo a trata nan? (4) Ki prijs nos rumannan no tabata dispuesto pa paga pa libertad? (5a) Con i na ki tempu Testigonan di Jehova a papia francamente contra e atrocidadnan dje régimen di Hitler? (5b) Con Hitler a reaccioná? (6) Con e solidaridad dje pueblo di Jehova a resultá di ta un salbabida pa nan i pa otronan den sentido físico i spiritual? (7) Cua cantica di Reino a ser skirbí den un campo di concentracion? (8) Cua ehempel di hende homber, hende muher i hóbennan fiel ta inspirá bo pa mantené bo integridad na Jehova pase loke pase? (Wak tambe e Anuario 1999, página 144-7.) (9) Como un Testigo di Jehova, con e video aki ta laga bo sinti pa loke ta no ser parti di mundu?
3 E ehempel positivo dje Testigonan di Jehova presentá den e video Para Firme por yuda hóbennan, asta esnan cu no ta Testigo, enfrentá cuestionnan importante manera intolerancia, preshon di pareunan i concenshi. Si bo ta un hóben cu ta bai scol secundario of scol mas avansá, ta posibel cu bo por duna bo maestronan e oportunidad pa usa e video aki den klas? Podisé bo por ofrecé nan un ehemplar dje video i describié como un parti di historia masha poco conocí of como un documentario cu ta contené un les moral.
4 E video Para Firme ta un herment excelente pa mustra con siñansa divino ta duna nos fortalesa spiritual pa agradá Dios dor di para firme pa loke ta corecto. (1 Cor. 16:13) Compartié cu tur hende cu ta interesá den e berdad.