Mantené Recreo na Su Debido Lugá
1 Den e tempu difícil aki, nos tur tin mester di un cambio di ritmo de bes en cuando. Un cierto cantidad di recreo ta na su lugá. Sin embargo, dedicá demasiado tempu na relahá, dibertí i na reunionnan social por pone un hende dedicá cada bes ménos tempu na actividadnan spiritual. Nos tin cu mantené recreo na su debido lugá. (Mat. 5:3) Con esaki ta posibel? Dor di sigui e conseho hañá na Efesionan 5:15-17.
2 Pone Límite: Pablo a skirbi cu cristiannan tin cu “vigilá cuidadosamente” pa nan hiba nan bida na un moda sabí. Nos mester di moderacion i dominio propio pa limitá tempu di recreo na loke ta realmente necesario. Ta bon pa nos considerá seriamente e manera cu nos ta usa nos tempu liber. Recreo mester tin un propósito positivo en bes di laga nos sinti cu nos a perde nos tempu, of laga nos keda morto cansá. Si nos ta sinti nos bashí, insatisfecho i tambe un poco culpabel despues di a participá den un actividad, esaki ta indicá cu nos lo mester haci ahuste den e manera cu nos ta usa nos tempu liber.
3 Sea Razonabel: Pablo a consehá pa ‘cumpra e tempu oportuno’ pa e cosnan mas importante di bida, i no bira “irazonabel.” Cristiannan dedicá no por permití nan bida drei rond di recreo. Aunke sosiegu i diberticion por renobá nos físicamente, e fuente di energia spiritual ta Dios su forsa activo. (Isa. 40:29-31) Nos ta ricibí su spiritu via actividadnan teocrático—studia Bijbel, asistí na reunionnan di congregacion, participá den sirbishi di veld—no mediante recreo.
4 Pone Prioridad: Pablo a instruí cristiannan pa “sigui percibí loke ta e boluntad di Jehova.” Jesus a bisa cu nos actividadnan mester enfocá riba e Reino di Dios como nos prioridad den bida. (Mat. 6:33) Ta masha importante pa nos haci promé e cosnan cu lo permití nos cumpli cu nos dedicacion na Jehova. Despues, por mantené tempu pa recreo na su debido lugá. Ora haci esei, recreo lo tin un efecto saludabel, i nos lo disfrutá mas di dje.—Ecl. 5:12.