Usa Bo Tempu na un Manera Sabí
1 Nos deseo di agradá Yehova ta motivá nos pa organisá nos bida rònt di aktividatnan spiritual. Su Palabra ta instruí nos pa sigui “buska promé e reino” i pa “hasi sigur di e kosnan mas importante.” (Mat. 6:33; Fil. 1:10, NW) Kon nos por saka tempu pa interesnan di Reino i mantené aktividatnan ménos importante na nan lugá?—Efe. 5:15-17.
2 Pone Aktividatnan di Reino na Promé Lugá: Programá bo tempu di tal manera ku bo no ta gast’é na kosnan ku no ta importante. Tin ruman ku na komienso di tur luna ta apartá tempu spesífiko riba nan kalènder pa sirbishi di vèlt. Kaba nan ta hasi sigur di no laga otro asuntunan interferí ku e plannan ei. Nos por hasi meskos pa saka tempu pa reunionnan, estudio personal i kongreso. Hopi ruman tin un programa diario ku ta kuminsá òf kaba ku lesamentu di Beibel. Apartá un tempu spesífiko pa kada aktividat importante, i no laga otro kos interferí ku nan innesesariamente.—Ekl. 3:1; 1 Kor. 14:40.
3 Limitá Uso di e Mundu: Den algun pais, ta fásil pa partisipá den deporte, entretenimentu, rekreo, hòbi i otro aktividatnan. Hopi hende ta dediká demasiado tempu na wak televishon òf na kòmpiuter. Sin embargo, si nos bira demasiado enbolbí ku aktividatnan di tempu liber i ku aparatonan nobo ku e mundu aki tin di ofresé, esei inevitablemente lo hiba na desepshon. (1 Juan 2:15-17) P’esei e Skritura ta urgi nos pa no hasi uso kompletu di e mundu aki. (1 Kor. 7:31) Dor di obedesé e konseho sabí ei, bo por mustra Yehova ku su adorashon ta na promé lugá den bo bida.—Mat. 6:19-21.
4 E tempu ku a resta pa e sistema aktual aki ta yegando su fin. Ta e personanan ku pone interesnan di Reino na promé lugá lo ta felis i lo haña Dios su aprobashon. (Pro. 8:32-35; Sant. 1:25) P’esei, laga nos usa e rekurso balioso aki, esta, nos tempu, na un manera sabí.