Con pa Cumpra e Tempu Oportuno
1 Teniendo hopi di haci den e sirbishi di Jehova ta mantené nos ocupá! (1 Cor. 15:58) Nos ta reconocé cu ta necesario pa studia personalmente i como famia, pa lesa e Bijbel tur dia, pa prepará i asistí na reunionnan di congregacion i pa participá regularmente den e ministerio di veld. Superintendentenan tin responsabilidadnan di pastoreá, i nan ta atendé otro debernan di congregacion. Algun tin responsabilidadnan pisá di famia of un variedad di obligacion pa cu otro hende. Pa logra haci tur cos como debe ser, tur hende tin mester di ekilibrio i bon organisacion personal.
2 Establecé Prioridadnan: Exito den ‘cumpra e tempu oportuno pa nos mes’ ta dependé di nos dicernimentu i bon huicio. (Efe. 5:15, 16) Nos mester determiná loke ta “e cosnan mas importante” i pone nan promé riba nos lista di prioridadnan. (Fil. 1:10) Un pareha a describí nan famia teocrático den e manera aki: “Nos ta yena nos bida cu e berdad . . . E berdad no ta parti di nos bida, e ta nos bida. Tur otro cos ta drei rond di dje.” Ta esencial pa pone e adoracion i sirbishi di Jehova na promé lugá den nos bida.
3 Identificá Actividadnan cu Ta Malgastá Tempu: Un siman tin 168 ora, i nos tin cu haci uso sabí dje tempu cu nos tin disponibel. Pa tin suficiente tempu pa actividadnan teocrático, nos tin cu identificá i minimisá actividadnan cu ta malgastá tempu. Un encuesta a revelá cu e adulto comun na Merca ta dedicá mas cu 30 ora pa siman na wakmentu di television! Pa otronan, hopi tempu ta ser usá pa lesa literatura mundano. Algun hende por ripará cu nan ta dedicá demasiado tempu na actividadnan social, hobinan, recreo, of algun tipo di actividad di computer. Tal bes nos tin cu examiná nos rutina diario pa mira con nos lo por usa nos tempu den un mihó manera. Ta sabí pa nos fiha límite n’e cantidad di tempu cu nos ta laga habrí pa actividadnan noesencial.
4 Desaroyá un Bon Rutina: Sea cual sea nos circunstancianan personal, cada un di nos por cumpra tempu pa actividadnan spiritual. Algun ruman a ripará cu cuminsando un poco mas trempan cada dia ta yuda nan logra mas. Si nos ta pasa hopi tempu biahando pa yega nos trabou of wardando riba otro hende, nos lo por usa algun di e tempu ei pa lesa Bijbel, prepará p’e reunionnan, of scucha informacion cu e Sociedad a percurá riba audiocaset. Famianan ta beneficiá mashá dor di apartá un ora specífico i regular pa studia huntu. Si cada miembro di famia ta puntual ora di asistí n’e studio di famia, nan tur ta beneficiá pasobra no ta malgastá e tempu di ningun di nan.
5 Cada dia cu pasa, nos mester bira mas profundamente conciente cu “e tempu cu a keda ta reducí.” (1 Cor. 7:29) Nos bida ta dependé dje manera cu nos ta usa e tempu precioso cu a resta. Nos lo ser bendicioná si nos cumpra e tempu oportuno di manera cu nos por mantené interesnan di Reino na promé lugá!—Mat. 6:33.