Wak Bon Kon Bo Ta Usa Bo Tempu
1 Den e era aki ku ta yen di aparato pa spar tempu i energia, hopi hende ta sinti komo si fuera nan tin mas kos di hasi i ménos tempu pa hasi nan. Abo ta haña ku ta difísil pa bo mantené un bon rutina spiritual? Bo ta deseá ku bo por tabatin mas tempu pa sirbishi? Kon nos por hasi e mihó uso di nos tempu?—Sal. 90:12; Fil. 1:9-11.
2 Identifiká e Kosnan Ku Ta Malgastá Bo Tempu: Kada tantu tempu, ta bon pa nos tur eksaminá e manera ku nos ta usa nos tempu. Beibel ta urgi nos: “Mira bon kon boso ta kana, no manera hende bobo, ma manera hende sabí, hasiendo bon uso di boso tempu, pasobra e dianan ta malu.” (Efe. 5:15, 16) Reflekshoná riba e desafionan ku e avanse den e ramo di teknologia di informashon ta trese kuné. Ounke tin motibunan válido pa usa kòmpiuter i otro aparatonan elektróniko, nan por bira un trampa si nos no wak bon kon nos ta usa nos tempu.—1 Kor. 7:29, 31.
3 Nos kada un mester puntra nos mes: ‘Tur dia mi ta dediká tempu na lesa i manda E-mail ku ta simplemente un molèster pa mi òf pa otro hende? Ta kada ratu mi ta papia na telefon òf manda mensahe via telefon selular tokante kosnan insignifikante? (1 Tim. 5:13) Mi ta sùrf riba Internet sin un propósito spesífiko, òf ora mi ta wak televishon mi ta kambia di un kanal pa otro sin niun meta? Preokupashon ku weganan elektróniko a kuminsá kita tempu for di mi studio di e Palabra di Dios?’ Di un manera sutil e tipo di aktividatnan ei por ruiná nos norma- i balornan spiritual.—Pro. 12:11.
4 Usa Tempu na un Manera Sabí: Aparatonan elektróniko tin e tendensia di apsorbá tantu nos tempu komo nos atenshon. Un hóben ku tabata profundamente apsorbá den weganan di kòmpiuter a atmití: “Tin biaha tabata difísil pa mi konsentrá si mi a hunga un wega promé ku sirbishi òf un reunion kristian. Kasi henter ora mi tabata pensa kon lo mi por resolvé un òf otro problema di e wega ora mi yega kas. Mi lesamentu i studio personal di Beibel a bai atras. Mi goso den sirbi Dios a kuminsá mengua.” Dor ku el a rekonosé ku e mester a hasi kambio, el a delete tur su weganan di kòmpiuter. E ta kòrda: “E kos ei tabata hopi duru. Mi tabata mas adikto na e weganan ku mi a kere. Pero tambe mi a sinti ku mi a logra un gran viktoria pasobra mi tabata sa ku mi a hasié pa mi mes bon.”—Mat. 5:29, 30.
5 Podisé ta nesesario pa tuma medidanan asina si tin áreanan den kua bo tin ku hasi ahuste. Bo por kita mei ora tur dia for di aktividatnan ku no ta dje importante ei? Esei ta mas o ménos e tempu ku bo tin mester pa lesa henter e Beibel den un aña. Esei sigur lo duna bo satisfakshon spiritual! (Sal. 19:7-11; 119:97-100) Apartá tempu spesífiko pa lesa Beibel, prepará pa reunion i sali den sirbishi di vèlt. (1 Kor. 15:58) Esaki lo yuda bo tene e kosnan ku ta malgastá bo tempu bou di kontròl i tambe lo yuda bo “komprondé kiko ta e boluntat di” Yehova.—Efe. 5:17.
[Questions]
1. Ki desafio hende tur kaminda ta enfrentá awe?
2, 3. Ki desafio e ramo di teknologia di informashon ta trese kuné, i kon kada un di nos por hasi un eksaminashon propio?
4. Ki kambio un hóben a hasi, i dikon?
5. Kon nos por saka tempu pa aktividatnan spiritual, i kon nos ta benefisiá di esaki?