Kiko Bo Ta Pone na Promé Lugá?
1 Kon lo bo kontestá e pregunta ei? Ta klaru ku nos tur ke pone interesnan di Reino na promé lugá. (Mat. 6:33) Pero nos tin ku puntra nos mes: ‘E desishonnan ku mi ta tuma ta mustra ku mi ta poniendo interesnan di Reino na promé lugá?’ Beibel ta animá nos: “Sigui duna prueba di loke boso mes ta.” (2 Kor. 13:5, NW) Kon nos por duna prueba ku nos ta poniendo e Reino na promé lugá?
2 Nos Tempu: Nos lo por kuminsá dor di analisá kon nos ta usa nos tempu. (Efe. 5:15, 16) Kuantu tempu ta bai tur siman na aktividatnan sosial, wakmentu di televishon, sùrf riba Internet òf na hòbi? Ora nos konta e kantidat di tempu ku nos ta dediká na e kosnan aki i kompará esaki ku e kantidat di tempu ku nos ta dediká na aktividatnan spiritual, nos lo por keda sorprendí. Nos ta traha overtaim, sakrifikando nos sirbishi sagrado djis pa nos por biba den luho? Kuantu biaha nos ta keda sin bai nos reunionnan òf sirbishi pa nos por rekreá durante fin di siman?
3 Pone Prioridat: Mayoria di nos no tin sufisiente tempu pa hasi tur loke nos tin gana. P’esei pa nos por pone interesnan di Reino na promé lugá, nos tin ku evaluá nos prioridatnan i programá tempu pa “e kosnan mas importante.” (Fil. 1:10, NW) Esakinan ta entre otro, studia e Palabra di Dios, partisipá den e ministerio, perkurá pa nos famia i asistí na e reunionnan kristian. (Sal. 1:1, 2; Rom. 10:13, 14; 1 Tim. 5:8; Heb. 10:24, 25) Otro aktividatnan manera ehersisio moderá i rekreo saludabel tambe tin nan benefisio. (Mar. 6:31; 1 Tim. 4:8) Pero nos tin ku mantené e kosnan ménos importante aki na nan debido lugá.
4 Un ruman hòmber hóben a trata di pone interesnan di Reino na promé lugá i a drenta den sirbishi di tempu kompletu en bes di buska estudio avansá komo preparashon pa un karera. El a siña un otro idioma i a muda bai sirbi kaminda tabatin mas nesesidat. El a bisa: “Mi ta pasando e mihó momentonan di mi bida aki. E ministerio ta hopi refreskante! E úniko kos ku mi ta deseá ta pa tur hóben hasi algu asin’aki i sinti loke ami ta sinti. No tin nada mas mihó ku sirbi Yehova ku tur loke nos tin.” Sí, ora nos pone e Reino na promé lugá, esaki ta trese bendishon pa nos. Pero mas importante ainda, e ta hasi nos Tata selestial, Yehova, kontentu.—Heb. 6:10.