Bo Ta Aplicando Loke Bo A Siña n’e Congreso di Distrito “Siñadónan dje Palabra di Dios”?
1 Ken cu a asistí n’e congreso di distrito dje aña aki por a mira cu e pueblo di Jehova ta determiná pa cumpli cu nan comision di ta siñadónan dje Palabra di Dios. (Mateo 28:19, 20) Ora bo a yega cas bek, cua puntonan specífico di instruccion bo tabata determiná pa aplicá den bo mes bida i den sirbishi di veld?
2 E Scritura Inspirá Ta Probechoso pa Siña Hende: E tema dje promé dia a enfatisá 2 Timoteo 3:16. E discurso clave a mustra cu pa ser “Completamente Ekipá Como Siñadónan dje Palabra di Dios,” nos mester tin sumo aprecio pa e Palabra di Dios, respet’é mas cu tur opinion of tradicion humano, i us’é fielmente. Tambe nos tin cu pidi tur dia den oracion pa spiritu santu yuda nos den nos ministerio i traha pa cultivá su fruta principal: amor. I nos tin cu permití Jehova su organisacion terenal entrená nos como minister mediante tur e reunionnan di congregacion.
3 E simposio di diabierne “Siña Nos Mes Miéntras Nos Ta Siñá Otro Hende,” a splica cu nos mester ta ehemplar den (1) pega n’e leynan di Dios den tur faceta di moralidad cristian, (2) den mantené bon custumber di studia i (3) den eliminá actitud i condicionnan di curason i mente cu Diabel por probechá di dje. Despues nos a siña maneranan práctico pa protehá nos famia dje plaga mundano di pornografia. A urgi mayornan pa pone un bon ehempel dor di evitá asta un bista pasahero di un esena sexual i controlá loke nan yunan ta mira riba Internet i na television. Cua dje puntonan di e programa di diabierne bo a cuminsá pone na práctica?
4 E último discurso dje dia a profundisá nos determinacion pa apreciá Jehova su lus, cana huntu cu e fiel ungínan di Dios i contribuí n’e pas di Jehova su pueblo. Bo a lesa e publicacion nobo E Profecia di Isaías—Lus pa Henter Humanidad II?
5 Adecuadamente Capacitá pa Siña Otronan: E texto central p’e di dos dia tabata 2 Timoteo 2:2. Segun cu bo tabata scucha e simposio di diasabra mainta, bo a tuma nota dje sugerencianan en cuanto con pa (1) busca hende merecedor, (2) cultivá nan interes i (3) siña nan pa warda tur loke Cristo a manda? Bo ta aplicando loke bo a siña, esta, mustra doñonan di cas por lo ménos un punto for dje Scritura i pone e base pa un rebishita?
6 E programa di atardi a enfatisá e importancia di imitá e Gran Maestro, Jesus. Den ki maneranan bo ta haci esfuerso pa ta mas manera Jesus? For di loke bo a siña den e di dos simposio dje dia, con bo ta kere bo por “Beneficiá Mas Plenamente di Educacion Teocrático”? Cua sugerencianan bo a aplicá pa aumentá bo capacidad di concentrá durante studio personal i reunionnan di congregacion?
7 Sin duda e provision nobo cu ta na caminda, Beneficiá di e Educacion dje Scol di Ministerio Teocrático, lo yuda nos crece den nos abilidadnan como orador i como siñadó dje Palabra di Dios. Lo bai duna mayor atencion na e cualidadnan di papia den público cu a caracterisá fiel sirbidónan di Dios den tempu bíblico. Cada les den e buki di instruccion nobo tin hoki cu ta mustra precis kico nos tin cu haci, di con e ta importante i con pa hacié. Tambe e tin ehercicionan práctico. Rumannan muher lo por scoge for di 29 marco di circunstancia ora di presentá nan asignacion. Cu tempu lo implementá e cambionan anunciá den e formato dje scol. Abo tin un bon rutina di studia i prepará pa asina bo por beneficiá plenamente dje Scol di Ministerio Teocrático tur siman?
8 Sea Maestro en Bista dje Tempu: Hebreonan 5:12 a prepará e mente dje auditorio pa diadomingo. E simposio di mainta “E Profecia di Malakías Ta Prepará Nos p’e Dia di Jehova,” a urgi nos pa duna Dios lo mihó di nos i odia tur forma di traicion pa asina nos por sobrebibí Jehova su dia grandi i inspirador di temor. E drama “Respetá Jehova Su Autoridad,” den un manera potente a mustra con e orguyo, ambicion, yaluzí i lealtad ekibocá di Core i su socionan di pasado a hiba na actonan di rebelion abierto contra asta Jehova. E discurso cu a sigui e drama a enfocá riba e necesidad den nos tempu pa someté na Dios su autoridad den e círculo di famia i den congregacion. E discurso público “Ken Ta Siñando Tur Nacion e Berdad?,” a suministrá prueba cu Testigonan di Jehova ta haciendo esei, na contraste cu cristiandad kende ta simplemente pretendé di ta siña berdad bíblico.
9 Claramente, Jehova ta entrená nos pa ta mihó maestro di su Palabra. Laga nos aplicá loke nos a siña, ‘prestando atencion constante na nos mes i na nos siñamentu, pa asina nos por salba tantu nos mes como esnan cu ta scucha nos.’—1 Timoteo 4:16.