“Di Unda Mi Ta Saca Tempu?”
1 Esei ta loke hopi di nos ta keha, ya cu nos bida ta yen cu actividad. Hende a yega di bisa cu tempu ta nos posesion mas balioso i a la bes esun mas pasahero. Pues, di unda nos por saca tempu pa cosnan cu ta realmente importante, manera por ehempel lesa i studia e Palabra di Dios?—Fil. 1:10.
2 E clave no ta pa busca mas tempu, sino dicidí kico nos kier haci den e tempu cu nos tin. Nos tur tin 168 ora pa siman. Di esei nos ta dedicá un 100 ora na drumi i traha. Pues con nos por haci e mihó uso dje oranan cu a sobra? Efesionan 5:15-17 ta recomendá pa nos ‘cana no manera hende imprudente sino manera hende sabí, cumprando e tempu oportuno i sigui percibí loke ta e boluntad di Jehova.’ Esaki ta mustra cu nos mester probechá bon di cada oportunidad pa haci e cosnan cu Jehova ta bisa ta esencial.
3 Jesus a compará nos tempu cu esun di Noe. (Luc. 17:26, 27) Hende dje tempu ei tabata ocupá cu asuntunan di bida di tur dia. Sin embargo, Noe a saca tempu pa construí un arca inmenso i pa predicá. (Heb. 11:7; 2 Ped. 2:5) Con bin el a logra? Dor di pone Dios su boluntad na promé lugá i obedecé Dios haciendo cosnan “precisamente asina.”—Gén. 6:22.
4 Kico Mester Ta na Promé Lugá? Jesus a bisa: “Hende tin cu biba, no di pan so, sino di tur expresion cu ta sali for dje boca di Jehova.” (Mat. 4:4) Tur siman nos ta ricibí un “midí di artículonan di cuminda [spiritual] na e debido tempu.” (Luc. 12:42) Pa nos digerí tur esaki den un manera cu nos ta ègt beneficiá, nos mester tin un programa regular di lesamentu i di studio personal. Como muestra di gratitud p’e alimento spiritual, nos no ta consider’é como cuminda pa come na careda, manera ‘fast food.’ Mas bien, e debido aprecio ta impulsá nos pa tuma tempu pa studia i saboriá cosnan spiritual.
5 Ingerí alimento spiritual por hiba na bida eterno. (Juan 17:3) Esei ta merecé un promé lugá den nos programa diario. Ta posibel pa nos saca tempu pa lesa Bijbel tur dia i prepará pa reunionnan cristian? Sí, nos por. Anto nos lo ricibí e “gran recompensa” cu conocé i haci e boluntad di Dios ta trece cuné.—Sal. 19:7-11.