Sea Moderá den Bistimentu i Areglo Personal
1 “Tur hende hòmber, asta mucha, tin dashi bistí. Tur hende muhé, asta tiner i mucha muhé chikitu, tin shimis òf saya bistí. Bo no ta mira ni un jeans ni un kamisa sin dashi. Tur hende ta lusi.” Asina un informe di notisia a bisa. Ki sorto di multitut e korant tabata deskribí? Un reunion polítiko? Un evento deportivo? Un konsierto di ròk? Nada di esei! E tabata deskribí e rumannan na un kongreso di distrito grandi aña pasá.
2 Na un otro stat kaminda nan a tene kongreso, un reportero a duna e siguiente deskripshon di e multitut di Testigunan: “Tur e hòmbernan ta limpi i bistí na bachi ku dashi. E hende muhénan ta bistí na un manera moderá pero elegante.” Un otro opservadó, un security guard, a deklará: “Boso ta hendenan di bon komportashon, respetuoso, limpi i na òrdu. Loke mi ta mira ta bunita. E mundu aki ta sushi, pero boso a logra kita e sushedat!” Ki un ekselente testimonio na nos fabor! Nos no ta gradisidu ku hende por papia asina bon di nos hermandat? Klaro ku ta tur hende den e multitut di Testigunan a kontribuí na e bon informenan aki dor di nan aparensia ehemplar.
3 Ta konosí rònt mundu ku nos aparensia ta remarkablemente diferente. (Mal. 3:18) Dikon? Pasobra nos ta sigui e konseho bíbliko pa “dòrna [nos] mes ku bistí apropiá, desente i moderá, . . . manera ta pas pa [esnan] ku ta teme Dios.”—1 Tim. 2:9, 10.
4 Kiko Bo Bistí i Areglo Personal Ta Indiká? E pañanan ku nos ta bisti i e manera ku nos ta bisti nan definitivamente ta duna un testimonio tokante nos: nos kreensianan, aktitut i intenshonnan. E estilonan ku nos ta skohe ta bisa ken nos ta i kiko nos ta representá. Nunka nos no mester promové e forma di pensa i kondukta degradá ku ta popular den mundu. Nos preokupashon no ta si un sierto estilo ta masha na moda, sino mas bien si e ta pas pa un persona ku ta bisa ku e ta un sirbidó di Dios. (Rom. 12:2) En bes di skohe un ‘look’ ku ta reflehá un spiritu independiente òf ku ta duna impreshon di un estilo di bida inmoral, nos lo kier mustra ku di bèrdat nos ta “glorifiká Dios.”—1 Ped. 2:12.
5 Tin biaha, un persona ku ta nobo i sin eksperensia, òf unu spiritualmente débil lo por aseptá tur loke e mundu ta promové den bistimentu i areglo personal, sin pensa promé ki klase di impreshon esei ta duna di Yehova i di su organisashon. Laga nos tur hasi un eksaminashon propio pa mira si e manera di pensa di e mundu no a influensiá nos. Nos lo por aserká un ruman respetá i spiritualmente madurá i pidié bisa nos onestamente kiko el a opservá di nos manera di bisti i areglá nos mes, anto despues evaluá seriamente e sugerensianan ku e duna.
6 Tin ruman ta bai di akuerdo umbes ku nan mester tene kuidou kon nan ta bisti ora nan ta asistí na kongreso. Pero despues di seshon, ora nan ta rekreá, nan ta baha nan norma. Mantené e norma haltu ku ta apropiado pa sirbidónan kristian. (2 Kor. 6:3, 4) Unda ku hende por mira nos, nos badge di kongreso huntu ku nos bistí i areglo apropiado ta identifiká nos komo Testigunan di Yehova. P’esei nos paña semper mester ta bon areglá i moderá, indikando ku nos “no ta di mundu.”—Huan 15:19.
7 Laga nos hasi tur loke nos por na e Kongreso di Distrito di e aña aki, “Proklamadónan Seloso dje Reino,” pa duna prueba ku nos ta “un pueblo konsagrá na SEÑOR [nos] Dios.” E bon impreshon ku esei lo duna lo oumentá Yehova su “alabansa, fama i onor.”—Deu. 26:19.
[Box on page 5]
Kon pa Glorifiká Yehova:
■ Bisti na un manera ku ta pas pa un sirbidó di Dios.
■ Evitá estilonan ku ta sigui e spiritu di mundu.
■ Ser moderá, esei ta reflehá sano huisio.